State inkara sipai chêtna titàwp rih turin PM ngen

Chief minister Zoramthanga chuan nimin khan prime minister Narendra Modi hnenah lehkha a thawn a, Mizorama Covid-19 darh zel tur vènna atan state leh state inkarah Central Armed Police Force (CAPF)-te veivâk ṭhin chu tun August thla chhung khap rih turin a ngen.

Chief Minister chuan, tun hnaia Mizorama Covid-19 vei hmuh thar zinga a tam ber chu sipai mi leh sa an nih thu te, tun dinhmuna Mizorama hripui vei mek zinga 75% chu sipai an nih thu te, Covid-19 vei sipai zinga a tam zawk chu Mizoram páwn aṭanga tun hnaia lut an nih thute a tarlang.

Paramilitary force-te chu mipui mimir zinga hripui kai darhtu an nih loh nan a ṭûl tàwpah lo chuan August thla chhung chu state leh state inkara an veivah khap rih turin CM Zoramthanga chuan Prime Minister a ngen a; Mizoram sorkarin Mizorama awm BSF-te tan quarantine centre leh covid care centre a buatsaihsak thu a ziak bawk.