Tuirial HEP thubuaia Court-in mi 6 thiam loh a chantir zingah CM unaupa a tel

Kum 2001 vela Tuirial Hydro Electric Power Project siamna atana ram lak (land acquisition)-a zángnadawmna dik lo taka lâk thubuaiah Aizawl District Court-a Special Court (Prevention of Corruption Act) chuan nimin khan thutlukna a siam a, mi paruk thiam loh a chantir a, an zingah hian Chief Minister Zoramthanga unaupa C Vanlalchhuana a tel a, mi pahnih chhuah zalen an ni thung.

Court-in thiam loh a chantir mi parukte chu nimin khan jail-ah dah luh nghal an ni a, anmahni hrem dan tur chu vawiinah puan a ni ang. Thubuai hi Central Bureau of Investigation (CBI)-in an chhui a ni.

Tuirial HEP zangnadawmna thubuaiah hian mi pakua - H Lianzela, MCS (tuna UDPA Director), C Vanlalchhuana s/o Darphunga (L), Electric Veng, Aizawl, Saiaithanga s/o Chhantuahlala, Tuithiang, C Rokhumi d/o Chawnghuliana (L), Durtlang, Lalduhawma s/o Lalhungliana, Durtlang Leitan, K Lalrawna s/o Thangluaia (L), Champhai Bethel Veng, PC Lalṭhazovi d/o Rodailova, Durtlang Leitan, K Darkunga s/o Chalbera (L), ITI Veng leh Lalrinsanga s/o Vanlalauva, Saipum, Kolasib district-te chu dik lo taka thil ti-ah puh niin, thubuai siamsak an ni.

Thubuai siamsak zinga mi parukte chu VC pass lem hmanga zangnadawmna an dawn theih nan sorkar buma puhna, inthuruala VC pass lem siamnaa inhnamhnawiha puhna, VC pass lem a dik anga lantira zangnadawmna dawnga puhnaahte Special Judge chuan thiam loh a chantir.

Thiam loh chantir zingah hian chief minister Zoramthanga unaupa C Vanlal­chhuana , Electric Veng, Aizawl a tel.

Ram lâk leh zangnadawmna buaipui laia Aizawl additional DC leh assistant settlement officer (ASO)-II H Lianzela, MCS leh Lalrinsanga, Saipum VC president ṭhin chu an tihdik loh finfiahna ṭha tâwk CBI-in an hmuh loh avangin special judge Dr HTC Lalrinchhana chuan a chhuah zalen thung.

Thil dik lo tia puh zinga pakhat K Darkunga, ITI Veng erawh chu thubuai ngaihtuah a nih chhunga a thih avangin a thubuai tihtawp a ni.

Special Judge tarlan danin, H Lianzela hi ram lak tur enfiah a nih laia team leader a ni a, mihring awm si lo zangnadawmna dawng tura thlan an awm chhanah te, ram pass lem 49 pawmsakahte leh actual payee receipt-a hming ziaktu leh a taka la dawng si lo tam takte pawisa tihchingpen thubuaite a awrh a ni.

H Lianzela thubuaiah hian Court-ah CBI lam thuhretu mi 119 an inlan a, H Lianzela thuhretute pawh eng emaw zat koh an ni bawk. CBI lamin a thiam lohna finfiahna ṭha tawk an neih loh avangin Court chuan a chhuah zalen ta a ni.

Court thu remnaah chuan, khawtlang nunah sumpai duhâm luatna a hluar hle lai leh thawhrim rah ni lo sum awlsam ûmnain ram inrêlbàwlna leh ram sumpai a nghawng chhe hle tih tarlan a ni a, "Hlemhlêtna leh kut tling loa sumpai ûmnain ram hmasawnna a tiṭhuanawp a, sorkarin ram a lâknaa zangnadawmna dikhlel leh tam uchuakin mipui sum a ei ral nasa a, hmasawnna hnathawh tisukuktu a ni. Hetiang thil hi mipuite'n inthuruala do tlân ngai a ni," a ti.