ESI-in Aizawl dist. pum a huam ṭan 2022-ah MR bill Rs 14,90,948 an pe

Employees' State Insurance (ESI) scheme chu February 1, 2023 aṭang khan Mizoramah Aizawl district pumpui huapin tihlen a ni. ESI-ah hian firm 265 inziak lut tawhin, kum 2022 chhung khan ESI dispensary-ah mi 1,633 an inentir a, MR bill Rs 14,90,948 pek chhuah a ni.

ESI Corporation chuan thuchhuah siamin, Aizawl khawpui chhung (AMC area) chauh an huam (cover) ṭhin chu kumin February 1 aṭangin Aizawl district pum huapin tihlen a ni a; Aizawl khawpui chhung chauh ni loin, Aizawl district puma mite inziah luh theih a nih tawh thu an tarlang.

ESIC tarlan danin, ESI hi ESI Act,1948 hnuaiah Ministry of Labour & Employment-in sorkar hnathawk ni lo, hmun danga thawkte health insurance tihna atana a din a ni a; thil siamna hmun, dawr, hotel, restaurant, media, zirna-in, damdawi-in, municipal body leh a dangtea thawkte tan inziah luh theih a ni.

ESI-a inziak lut turin thawktu mi 10 aia tlem lo an awm a ngai a, website www.esic.in leh Shram Suvidha Portal-ah chiang zawkin tarlan a ni.

Mizoramah chuan ESI hi December 2015-ah kalpui ṭan a ni a, kalpui ṭan aṭanga January 2023 thleng khan Aizawl khawpui chhung chauh a huam a, February 2023 aṭangin Aizawl district a huam ta a, district dangte pawh la huamtir zel tum a ni. RZ Lalbuaia Building, Zodin Square-ah pisa an nei a, Zaluta Building, Venghluiah damlo inentirna tur dispensary an nei bawk.

ESI dispensary-ah kum 2022 chhung khan mi 1,633 an inentir a, inentirte chu damdawi an mamawhte a thlâwn veka pek a ni. Kum 2022 chhung vêkin ESI hnuaiah mi 97 chu damdawi-inah dah luha enkawl an ni a; ESI-a inziak lut damlote inenkawlna senso (medical reimbursement) Rs 14,90,948 pek chhuah a ni.

Aizawla ESIC hotute chuan, ESI chu India rama sorkar hnathawk lote tana health insurance ṭha ber pawl a nih thu sawiin, inziak lut turin non-government firm zawng zawng an sáwm a; thawktu mi 10 aia tlem lo nei chinte chu inziak lut ngei ngei turin ESI Act-in a phût thu an sawi rualin, thawktu (employee) leh mi ruaitu (employer) tan sum tlem azawng thawh a ngaih thu an sawi bawk.