HBC zirlaite'n kawngpui an dang; Vawiinah an pungkhawm leh dawn

Hrangbana College (HBC)-ah zirtirtu dah belh phûtin nimin khan Chanmari-a an college building bul kawngpuiah HBC Students’ Union huaihawtin HBC zirlaite an nuar a, chawhma dar 10 vel aṭangin lirthei kaltlang theih lohin kawngpui an dang. Vawiinah pawh an pungkhawm leh dawn.

HBC zirlaite hian zirtirtu dah belh phûtna thuziak an keng a, an aurual bawk. Sorkar aṭangin an thil phût tihhlawhtlin ni lo mahse zirlaite chu nimin chawhnu dar 3 vel khan an ṭîn darh.

HBC SU hruaitute chuan nimin tlai khan Higher & Technical Education Director an hmu a, an lungawina khawp chhanna an dawng lo. Hei vang hian nimin tlai khan an kal zel dan tur an rél a, vawiinah pawh an college bulah punkhawm leh an rel a ni.

HBC SU tarlan danin, contract-a thawk assistant professor-te January 27, 2023-a dah ngheh an nih hnua an awmna tur leh zirtirtu a ngheta thawk da ṭhenkhatte awmna tur siamremah HBC-a zirtirtu paruk sawn chhuah a ni a, zirtirtu pathum dah luh ani thung.

An zirtirtu thawk mek zingah February 2023 tàwpa pension-a chhuak tur pahnih leh kumin chhunga pension tur eng emaw zat an awm niin HBC SU chuan an tarlang.