Assembly budget session ṭan a ni

Mizoram Legislative Assembly budget session chu nimin khan ṭan a ni a, February 28, 2023 thleng a awh dawn. Session ṭan ní-ah hian Governor Hari Babu Kambhamphati-a'n thu sawiin, Mizoram sorkar hmalakna hrang hrangte a tarlang.

Governor-in thu a sawi zawhah MNF member Dr ZR Thiamsanga'n Governor thusawia lawmthu sawina, motion of thanks a pu lut a, MNF member vek Dr Van­lal­ṭanpuia'n a thláwp. Larsap thusawia lawmthu sawina motion hi vawiinah sawiho a ni ang a, pawm tum a ni ang.

Assembly speaker Lalrinliana Sailo chuan, speaker leh deputy speaker an awm loha House inkhawm kaihruaitu tur, Panel of Chairman atan Dr L Thangmawia, Lalrindika Ralte, Zothantluanga leh K Laldawngliana te ruat an nih thu a puang.

Vawiin hian Assembly session-ah Governor thusawia lawmthu sawina sawiho a nih dawn bakah, tun ṭum session leh session hmasa inkara MLA thite sûnna hun hman a ni dawn a; deputy speaker thar tur thlan a nih dawn bakah, zawhna leh chhanna hun hman a ni ang.