MNF innghahna chu Mizo nationalism - MNF Vice President

Mizo National Youth Front (MNYF) office bearer-te leh Aizawl khawpuia MNYF block 13 hruaitute chu nimin khan Mizo Hnam Rûnah an ṭhukhawm a; an hun hmanpuitu MNF vice president Vanlalzawma chuan, MNF innghahna chu Mizo nationalism a nih thu a sawi.

Vanlalzawma chuan, political party dangin MNF inrêlbàwlna ang an nei ve lo nia sawiin, "Keini chuan hnam thinlung púin ram kan kaihruai. MNF innghahna hi India nationalism a ni lo a, Mizo nationalism a ni. Kan danglam bikna hi ṭhalaite'n an hriat thar zel a ṭul. MNF hi Mizote innghahna lungphûm a nih zel theih nan ṭhalaite'n nasa zawka ke kan pên a ṭul a ni," a ti.

MNF chu ṭhalaite din a nih thu sawiin Vanlalzawma chuan, "Pu Laldenga’n MNF a din khan kum 34 chauh a ni a, remna ziah dawna Delhi a kal dawn pawh khan a hmatheh ber chu ṭhalaite tho a ni. MNF nunphung hi ṭhalaite a ni," a ti a; kumin kum tawpa inthlanpui pawh ṭhalaite kutah a awm thu a sawi.

MNYF vice president Zodinpuia pawhin thu sawiin, hripui léng avangin ni 718 chhung Mizoramah lockdown chi hrang hrang kalpui a nih thu a sawi a, "Hripui léng vanga sorkarin sum leh paia harsatna a neih hi chhuanlam a ni lo a, thil thleng dik tak a ni," a ti.