Politics ṭha kan neih theihna atan Theihtawp chhuah a ngai - Lalsawta

Aizawl District Congress Committee (ADCC) huaihawtin nimin khan Chanmari YMA Hall-ah kum 2020-a Aizawl Municipal Corpo­ration leh local council inthlana Congress party candidate-te intawh­khawmna buatsaih a ni a; thusawitu MPCC presi­dent Lalsawta chuan, politics ṭha neih theihna turin theihtawp chhuah a ngaih thu a sawi.

ADCC president Lal­robiaka kaihhruai inkhawm­ah hian Lalsawta chuan, politics chu telna tlâka miin an ngai lo a nih chuan an duh lohte awpna hnuaiah an awm dawn tihna a nih thu a sawi a, "Chuvangin, politics ṭha kan neih theih nan theihtawp kan chhuah a ngai," a ti.

MPCC President chuan, politics chu tlân­chhiatsan theih a ni lo tih sawiin, "Mi tin min hrût vek avangin ngaihven a ngai," a ti a; Mizoram buai lai pawhin independent sual ṭul ti lote pawhin an tuar vek tih a sawi.

Congress party Presi­dent chuan, Mizoram chu taima leh thawk rimte dinchhuahna ramah siam an tum thu sawiin, "A dik lo leh mipui tizawmthaw zawngin ram kan hruai dawn lo. Ṭang puihna hi khawvel ram tinah mihring dinchhuahna bul a ni. Ṭang puihna hmang hian ṭhalaite leh eizawnna mumal nei lote tan eizawnna ngêlnghet buatsaih a ni ang," a ti.