KHAWTHLIR

Hmun enfiah
Champhai District Narco Coordination Centre (NCORD) Committee chairman James Lalrinchhana, bawrhsap leh sorkar hotute leh khawtlang hruaitute chuan nimin khan Champhaia Narcotics Control Bureau (NCB) office leh quarters sakna tura ram hman phalte a hmunah an enfiah. Enfiahnaah hian rawtna an siam a, thuneitu sang zawk hnenah thlen an rel a ni.

Kawng khâr dawn
Chhingchhip leh Hualtu inkar kawng siam mekah chak leh ṭha zawka hna thawh a nih theih nan Serchhip SP Stephen Lalrinawma chuan February 9 aṭanga February 12, 2023 zan dar 10 inkarah kawng khâr tur a nih dawn thu a tarlang.

ZORO leh AMMA
Zo Reunification Organisation hruaitute chuan nimin khan an pisaah All Mizoram Manipuri Association (AMMA) hruaitute an kâwm. ZORO hruaitute chuan, Myanmar aṭanga ráltlânte Manipur sorkarin man a, jail-a a khung leh Myanmar-a a thawn lêt ṭhin chu pawi an tih thu an sawi.

Zirlaibu tlangzarh
Mizoram Board of School Education-in pawl 9 science leh mathematics zirlaibu English leh Mizo ṭawng inkawpa an siam chu February 6, Thawhṭanni khan Human Resources Development Board vice chairman Dr L Thangmawia, MLA-in MBSE conference hall-ah a tlangzarh. Dr L Thangmawia chuan he zirlaibu thar tihchhuah a nih theihna atana ngaihtuahna sengtu Education Minister, a hlawhtlin theih nana chak taka bawhzuitu MBSE leh zirlaibu Mizo ṭawnga lehlin hna hautak tak thawktu zirtirtu leh mithiamte chungah lawmthu a sawi.

Pangang khawina tur project hawng
Sericulture department chuan nimin khan Lunglei High Powered Committee (HPC) bultuma pangang khawi tura hmalakna Eri Seed Development Project khuhhawnna an buatsaih a, Lunglei HPC chief planning officer C Vanlalmuana'n a hmanpui. Pangang khawi turte chu Rs 1,00,000 (pawisa leh hmanrua) pek tur a ni a, nimina a hawnnaah hian pangang khawi tura thlan mi 10 hnenah lo vahna, hâlna leh thil danga hman tur Rs 9,880 ṭheuh pek a ni.