Jeremy Lalrinnunga DSP hna pe turin Governor-in Chief Minister a ngen

Governor Dr Hari Babu Kambhambati chuan nimin khan chief minister Zoramthanga hnenah lehkha thawnin, Commonwealth Games 2022-a gold medal latu Jeremy Lalrinnunga chu Mizoram Police-ah hna pek a, deputy superintendent of police (DSP)-a dah ṭha a tih thu a hrilh.

Dr Hari Babu Kambhambati chuan a lehkhaah hian, Mizoram Weightlifting Association-in an ngen angin, Jeremy Lalrinnunga chu DSP hna pek (appoint) ṭha a tih thu a tarlang a, "Kan hriat angin Jeremy hi ram tan mi chhuanawm a ni a, kan state tan CWG 2022, Birmingham-ah gold medal a la a ni. Sum leh thil danga state sorkarin chawimawina a pek tawhte lawmawm ka ti hle," a ti.

Governor chuan, Jeremy Lalrinnunga chawimawina atan leh infiammi dangte'n India leh Mizoram tan thil ropui zawk an rawn hawn theih nan Mizoram Weightlifting Association-in an ngen angin, Jeremy Lalrinnunga chu DSP hna pek ṭha a tih thu leh state sorkarin ngaihtuah thei se a duh thu a tarlang a ni.