Kumin chhungin IHM-ah zirna ṭan tum

Tourism minister Robert Romawia Royte chuan nimin khan Bung Banglaa Institute of Hotel Management (IHM) sak mek a tlawh a; kumin chhungin IHM-ah zirna kalpui ṭan tum a nih thu a sawi. IHM hi Ministry of Tourism-in Mizoram Tourism department hnena cheng nuai 800 a pek hmanga sak a ni.

Robert Romawia Royte chuan, IHM sakna tur sum chu kum 2008-09-ah cheng nuai 800 pek a nih thu sawiin, "Hun eng emaw chen hnuah sorkar thar a lo din leh hnu kum 2019-ah IHM danin a phût angin Cabinet-in IHM atan post 32 siamin a taka a function nan ṭan a la a ni," a ti a; hripui vanga harsatnain hmalakna a timuang chungin hmanrua ngai turte lei thar a nih thu a sawi.

Kumin chhungin IHM-ah course eng emaw ber kalpui ṭan tum a nih thu sawiin Minister chuan, "Mizoram mamawh em em a nih avangin sum harsatna khirh tak karah pawh a taka a function ṭan dan tur sorkarin a ngaihtuah mek a, tih ngai la tam viau mahse kumin chhungin eng course ber emaw chu ṭan kan beisei," a ti.

Tourism Minister hian tun hnaia Ministry of Tourism-in cheng nuai 200 a pek hmanga IHM atana bungbel leh hmanraw lei tharte a en a; MLA pali - Prof. F Lalnunmawia, Lawmawma Tochhawng, Dr Vanlalṭanpuia leh K Laldawngliana te bakah, Tourism hotute'n an ṭawiawm a ni.