Skywalk leh ropeway chhui tura CBI koh luh tumah MPYCC lâwm

Mizoram Pradesh Youth Congress Committee chuan, Sakawrhmuituai tlanga skywalk leh Chaltlang leh Durtlang inkara ropeway siamna tur sum hman dan chhui tura High Court-in Central Bureau of Investigation (CBI) a ko lut dawn ta chu lawmawm an tih thu an tarlang a; CBI-in an chhui theihna tura hma latu journalist Zomuanpuia Tlau, Kolasib chu nimin khan an pisaah tawlhlohpuan an bahtir.

MPYCC president Dr Lalmalsawma Nghaka chuan, sorkar laipui aṭanga hmasawnna tur project tihṭhuanawp leh tihkhawtlai a ni chu pawi an tih thu sawiin, "Congress la sorkar chhunzawm ila chuan skywalk leh ropeway hi Sikkim-a a puitling tawh ang khuan a puitlin tawh ka ring," a ti.

Dr Lalmalsawma chuan, Congress sorkar laia Tourism minister John Rotluangliana'n skywalk leh ropeway siam chungchanga CBI koh luha chhui a ngam chu lawmawm an tih thu sawiin, "He project-ah hian thil dik lo titu an awm a nih chuan CBI hian chhui chhuakin, dan anga hrem ni ngei se tih hi kan duh dan a ni," a ti a; GAD Aviation Wing-a eirûkna a awm nia hriat chhui tura Mizoram Lokayukta-in CBI koh luh a rawtna pawh MNF sorkarin tipuitling ngei se an duh thu a sawi bawk.