Assam-ah Border Festival buatsaih a ni

Assam sorkar ruahmanna angin nimin khan Abhijit Nag Mini Stadium, Katlicherra, Assam-ah Mizoram leh Assam inrina Sonitpur leh Hailakandi district-ah inlaichìnna ṭha a awm theih nan Border Festival buatsaih a ni a, Katlicherra bialtu MLA Sazum Uddin Lasker leh Kolasib DC John LT Sanga ten an hmanpui.

Assam-Mizoram Border Festival hi Hailakandi bawrhsap Nisarg Hivare-a'n a kaihruai a; hnam ziaráng pho lanna hun hman a nih bakah, Hailakandi district leh Saidan FC-ten football friendly match an khel a ni.

MLA Sazum Uddin Lasker chuan, ramri a rálmuan theih nan Katlicherra-a Border Festival buatsaih ang chu Kolasib district-ah pawh buatsaih ṭha a tih thu sawiin, "Hnam ziaráng inzir tawnna leh induhsak tawnna lantirna chuan inpawhna leh inunaunna ṭha a hrin chhuah ka beisei," a ti a; Mizoramah vawi eng emaw zat a kal tawh thu te, Mizote chu hnam rinawm leh fel tak nia a hriat thu te, Festival chhim tura Kolasib district aṭanga kalte chungah a lawm thute a sawi.

John LT Sanga pawhin thu sawiin, ramri rálmuanna turin state sorkar pahniha DC inkarah inbiakna ṭha tak kalpui ṭhin a nih thu a sawi a, "Ramri hnaiha huan, lo, ram neite pawhin an huante pawh harsatna awm loin an enkawl chhunzawm zel niin ka hria. Inbiakna mumal tak kalpuinain harsatna sutkian kawngah inhriatthiamna, thawhhona leh inpawhna ṭha a hring ṭhin. Festival hian district pahnih inkarah inpawhna ṭha zawk a siam ngei ka beisei," a ti.

Festival hi ṭum khat buat-saihna a ni a; ramria district awmte inpawhna leh inkungkaihna ṭha zawk siamna tura ruahman a nih bakah, insumdawn tawnna leh sorkar hnathawkte indàwr tawnna hun ṭha siamna tura buatsaih a nih thu sorkar thuchhuahin

a tarlang.

Border Festival-ah hian Kolasib district leh Hailakandi district-a sorkar hotute an tel a ni.