MADC sorkar tum lian ber chu New Maraland din a ni - MADC CEM

Mara Autonomous District Council (MADC) chief executive member (CEM) M Laikaw chuan, a kaihhruai MADC sorkar tum lian ber chu New Maraland din a nih thu a sawi.

M Laikaw hian February 6, Thawhṭanni khan a pisaah thuthar thehdarhtute a kâwm a; MADC sorkar ding mek chu BJP sorkar dik tak a nih thu sawiin, "MADC sorkar policy lian ber chu New Maraland din a ni a, sorkar ṭha siamin, corruption tihbo a ni ang," a ti.

CADC CEM chuan, "Department mamawh leitu tur Purchase Board din a ni ang a, hemi kaltlang chauhin office mamawh lei a ni tawh ang," a ti a; ṭul loa sum tam tak hman ralna tihbo a nih dawn thu te, sum hmanna thunun ṭhat a nih dawn thu te, lirthei hman man leh petrol/diesel pawh khuahkhirh tum a nih thu te, khuallian tura state páwna kal khap a nih thute a sawi.

M Laikaw chuan, MADC chhunga tribal ni lote sumdawn chungchangah khauh taka kal an tum thu te, Art & Culture an ngaih pawimawh dawn thu te, file pawh Mara ṭawnga kaltir ṭan a nih thute a sawi a; "Governor paltlang loa state sorkar aṭanga order lo chhuak ṭhin kan pawm ve tawh dawn lo," a ti bawk.