Kan fimkhur loh chuan dinhmun chhe zawkah kan ding thei - Medical Operational Team

Covid-19 Medical Operational Team chairman Dr ZR Thiamsanga, MLA chuan, medical lam aṭanga thlirin, Mizoramah tun aia kan fimkhur loh a, inthlahdah a nih chuan Covid-19 vangin dinhmun chhe zawkah ram leh mipui an ding thei tih chu an hmuh dan a nih thu a sawi.

Vanglaini palai zawhna chhangin Dr ZR Thiamsanga chuan, Mizoram dinhmun a him lo tih a sawi a, "Kan fimkhur viau a ṭulin kan hria. A nih loh chuan dinhmun chhe zawkah kan ding ang tih a hlauhawm. Kan dinhmun thlirin vantlanga inkai darh (community spread) pawh thleng thei reng a ni a, kan inthlahdah loh a, kan fimkhur telh telh a pawimawh tak zet," a ti.

Dr ZR Thiamsanga chuan, fimkhur loh leh inthlahdah vangin ram ropui tak takte pawh Covid-19 lakah an tláwm tih sawiin, "India ram ngeiah pawh central lam an tláwm tawh a, kan ṭhen­awm state-te pawh an buai tawh hle. Tun hi kan fimkhur zual a ngaih lai tak a ni," a ti a; fimkhur loha inthlahdah zel a nih chuan hripui kai tamna ṭhen­awm state dinhmun anga awm an hlauh thu a sawi.

Medical Team Chair­man chuan, fimkhurna leh sorkar ruahmante zawm ṭhat a nih chuan dinhmun chhe taka ding loa awm theih an beisei thu sawiin, "Mipuite'n thu an awih a pawimawh tak zet. Chhiatní ṭhatníahte pawh tunlai boruakah hi chuan lang lo ngam ila a duhawm hle. Chu chu kan tan, kan chhungkaw tan, kan ram tana thil pawimawh tak a ni," a ti.

Damdawi lama thawkte rilru aṭang chuan total lockdown ṭha an tih thu sawiin ZR Thiamsanga chuan, "Chutih rualin, medical lam chiah ngaihtuah theih a ni lo. Mipui leh kan economy din­hmun kan ngaihtuah tel a ṭul," a ti a; total lockdown puan a nih loh avangin mipuite'n páwna chhuah phêt tum lo se an duh thu a sawi.

Dr ZR Thiamsanga chuan, police-te'n dan zâwm lote khauh zawkin vil se a duh thu sawiin, "Mask vuah lo man, social distancing zawm lo man leh curfew-te hi tun aia khauh zawkin kalpui theih ni se a duhawm hle. Chutih rualin, police lam pawh an indaih lo deuh a ni mai thei. Pawisa inchawitir lam ngawr ngawr a ni lo a, kan him tlanna atana thil pawimawh tak a ni," a ti.

Local task force-te'n boruak eng emaw deuh a awma an huam chhunga total lockdown an puang ṭhin chu medical lam mit aṭang chuan ṭha an tih thu sawiin Dr ZR Thiamsanga chuan, "Sawiselna awm deuh ṭhin mah se, hetia task force-te'n total lockdown an lo puang hi contact tracing leh tual­chhunga inkaih darh tur venna atana thil ṭha tak a ni," a ti a; task force chu state dang neih ve loh thil ṭha tak a nih thu a sawi.