Covid-19 do tura inpete chawimawi

Nimin khan Lunglei Chief Medical Officer (CMO) pisa-ah Lunglei district chhunga Covid-19 do tura inpete chawimawina hun buatsaih a ni a, certificate leh pawisa hlan an ni.

Chawimawina inkhawmah hian CMO Dr Thani Pachuau chuan, Covid-19 vanga thawktu indaih lo lai taka hlawh nei loa labarotory technician, nurse, driver leh a ṭul apiang thawk turin Lunglei district-ah mi 20 an inpek thu a sawi a, "Volunteer-te'n Covid-19 donaa an thiamnate hman ṭangkai nachang an hria hi a lawmawm hle. An inpekna hi a tê lo a, ṭangkai tak leh hmasawnna ṭha tak a ni," a ti.

Lunglei district-ah hian volunteer 20 bakah, Lunglei West bialtu MLA C Lalrinsanga'n Health department chu mi pasarih a rawihsak a, Lunglei HPC vice chairman Lawmawma Tochhawng-in thla hnih chhung atan mi pahnih leh lirthei pakhat a rawihsak bawk.