Kan fimkhur loh chuan zan hnih khatah chhiatna vàwrtàwp tâwk thei kan ni - Health Minister

Dr R Lalthangliana hian May 16, Inrinni khan thuchah a tichhuak a, state páwn aṭanga rawn haw an awm loh lai chuan Mizoram chu Covid-19 lakah a hima a lan thu a sawi rualin, tunah chuan mi ṭhahnem tak an rawn haw tawh avangin fimkhur zual a ngaih thu a sawi a, "Sorkarin dan leh hrai zawm tur a siamte kan zawm tlân vek loh chuan zan hnih khat thilah fimkhur loh vanga chhiatna vàwrtàwp thleng thei reng kan ni tih i hre reng ang u," a ti.

Health Minister chuan, "State dang aṭanga lo luhna gate pui hawnsakin, tam tak an rawn haw tâkah chuan, hri kai tamna hmun thui tak paltlanga rawn haw mekte an nih avangin kawng lakah kai palh awm theih a ni," a ti a; kawng tinréngah a hma aia fimkhur zual a ngaih thu a sawi.

"Sorkar leh private hospital-a kan hmanraw neihte thlir hian Covid-19 vei tam zawk enkawl a zuamawm lo hle. ZMC-ah pawh ICU-ah khum pasarih kan nei a ni mai a, damlo pakhat enkawl pawh a buaithlak a, doctor leh thawktu dangte enkawlna senso pawh a hautak hle. Covid-19 vei hi doctor zawng zawngte enkawl theih a nih loh avangin a enkawltu bik an awm a ngai a, a damdawi hmuh chhuah a la ni si lo, enkawl a buaithlakin a hautak hle a ni," a ti.

Inkhàrkhip thawh thumna a zawh dawn tâk thu sawiin Dr Thangtea chuan, "Sorkar pawhin uluk takin hmanraw chi hrang hrang nen hma a la a, state/district/local task force te, kohhran leh mimal angte'n theihtawpin hma kan la ṭheuh. Tunah tak hi chuan hriat theih chinah Covid-19 vei Mizoramah kan awm ta rih lo," a ti a; India ram hmun hrang hrang aṭang pawhin Mizoram sorkar leh task force-te inpekna leh  thawhhonain fak a hlawh thu a sawi.

Health Minister chuan, India leh Mizoram sorkar pawhin inkhàrkhipah ei leh bàr lak luh kawngah a pawi lo chinah inthlahdul deuhin thil kalpui mek a nih thu a sawi a, "Tunah hian kan ram mi leh sate ngei state hrang hrangah hun rei tak tangkhangin an mangang mek. Chief Minister kaihhruaina hnuaiah theihtawp chhuah­in kan unau tangkhangte lak luh hna ngawrh takin sorkarin a kalpui mek a, lo haw tur hi mi sing chuang dawn ni tura ngaih a ni," a ti.

Quarantine centre-a awm mek leh in lama quarantine-te chu sorkar thu zâwm tura chahin Minister chuan, "Duhthusam anga ṭha leh nuama inenkawl vek theih a nih loh pawhin 'Ram tana ka tih ve theih a ni’ ti chunga lungdam taka an pawm thiam ka duhin ka ngen a ni. An lo chhuah hunah pawh thil thleng palh thei a la awm a ni tih hre chunga ṭhian ṭha leh chhung­khat laináte tlawhpawh kawngah fimkhur turin ka ngen a ni," a ti.

Health Minister chuan, state páwn aṭanga haw tur tam zawk an rawn haw zawh hnuah pawh chawlhkar hnih vel chu fimkhur zual a la ngai dawn tih sawiin, "Chumi hunah chuan kan ram dinhmun a la hriat theih chauh ang. Chumi hnu zelah pawh Covid-19 in kan ram dinhmun a tihdanglam dan tur chin a la hriat loh. Chuvangin, thuneitute hmalakna kan zawm zel a pawimawh a ni," a ti a, mipuiin thu an awih phawt chuan Pathianin mal a sàwm tur thu a sawi.