Harsa leh chhia zawng zawng phur chunga SEDP kan sem thei hi a lawmawm - Zoramthanga

Chief minister Zoramthanga chuan, an sorkar chhungin kawng hrang hrangah harsatna naménlo an tawh thu sawiin, harsa leh chhia zawng zawng phur chunga SEDP an sem thei hrâm hrâm chu lawmawm a tih thu nimin khan Assembly budget session-ah a sawi.

Assembly session ṭan nía Governor thusawi chungchanga lawmthu sawina motion nimina sawihonaah Zoramthanga chuan, sum harsatna vanga sorkar hnathawk hlawh la tlai te, bill pek theih loh te, healthcare bill tángte chu a hriatthiam thu leh Asian Development Bank-ah theihtawpa ṭan lain an la kal hrâm hrâm thu a sawi a, "A harsa leh chhia zawng zawng vawi khata kan phurh khawm laia duhthusam ni lo mah se, SEDP a sing téla chhungkaw sing téla kan han sem chur chur mek zel theite hi a lawmawm kan ti," a ti.

Chief Minister chuan, "Inthlan hmaa kan target-ah chuan Rs 3,00,000 emaw, a aia tam emaw a ni a, a tih pawh kan tum. Covid-19 lo thlen hmaa sum dinhmun a la ziaawm lai kha chuan a dah pawh kan dah tam. Amaherawhchu, Covid-in min man ta a, sum a harsa a, engmah kan ti hlei thei ta lo," a ti a, a tira departmental-a hma an lo lâk chin pawh a tawp niin a sawi.

Eptu member-te'n SEDP-a Rs 3,00,000 an intiam chunga term tawp dawn lama Rs 25,000 chauh an sem tia an sawi chu sawifiahin Zoramthanga chuan, an term chhungin hripui an tawrh bakah chhiatna hrang hrang a thlen thu a sawi a, "Vawk pûl hri a léng a, ráltlân tam tak buaipui an ngai a, sum leh pai dinhmun a harsa hle a ni," a ti.

Finance minister ni bawk Zoramthanga chuan, kum 15 dawn chief minister leh finance minister a nih chhungin tun anga sum leh pai dinhmun harsatna an la tawng ngai lo nia sawiin, "SEDP hi kan sem thei lo turah ka ngai a, eng maw ti tiin theihtawp kan chhuah a, Rs 25,000-in chhungkaw 60,000 hnenah kan sem phawt a ni," a ti a; a vawi hnihnaah Rs 25,000 an sem leh dawn thu a sawi.

Chief Minister chuan, financial year tharah SEDP la dawng lo chhungkaw sing tél a thara pek an tum thu te, kumin kum tawpa Assembly inthlanpui awm turah MNF an tlin leh ngei an inbeisei thu te, SEDP chu ṭha zawka an chhunzawm theih a beisei thute a sawi bawk.

Governor thusawi chung­changa motion of thanks sawi­honaah hian House member tam berin thu an sawi a; rorel lai MNF member-te'n lawmawm an tih thu an sawi laiin, eptu member-te erawh chuan lawmna tur a awm loh thu an sawi tlangpui thung.

Motion of thanks pu luttu Dr ZR Thiamsanga'n motion chu pawm a dil hnuah pawm a ni ta a ni.