KHAWTHLIR

Deputy Speaker H Biakzaua
Nimina Assembly session-ah Lawngtlai East bialtu MLA H Biakzaua chu chuhtu awm loin deputy speaker atan thlan a ni. Deputy speaker atana thlan tlin a nih thu Assembly speaker Lalrinliana Sailo-in a puan hnuah, Speaker, House leader Zoramthanga leh opposi­tion group leader pahnih Lalduhoma leh Zodin­tluanga Ralte ten a ṭhutna turah an hruai a ni.

Kuhva man lo
Commerce & Industries minister Dr R Lalthangliana chuan nimin khan Assembly session-ah ZPM member Vanlalhlana zawhna chhangin, kum 2022 chhungin CI department-in dan loa kuhva tawlh rûk man an neih loh thu House a hrilh.

Heroin man
Mizoram Police leh 2nd Assam Rifles ṭangkawp chuan January 7, Thawhlehni tlai khan Lalnunzira (32) s/o Vanlalkawla leh Lalbiaktluanga (32) s/o Kapchhuanga, Zokhawthar mi ve ve hnen aṭangin Sesawng dáiah heroin gram 680 an man. Heroin hi international market-ah cheng nuai 340 hû a ni.

Handloom Expo
Mizoram Apex Handloom & Handicraft Cooperative Society Ltd (MAHCO) chuan nimin khan Lungleia Saikuti Hall-ah State Handloom Expo an buatsaih a, district bawrhsap Ramdinliani'n a hawng. Expo-ah hian dawr 31 hawn a ni a, February 14, 2023 thleng a awh ang.

Mau sawi lo
Congress Legislature Party leader Zodintluanga chuan, Governor-in Assembly budget session ṭan nía thu a sawiah sorkar flagship programme mau chungchang a sawi lang lo tih nimin khan a sawi a; CM tuipui em em policy chu a hlawhchhama a hriat thu sawiin, sum siamna tur ringawta mau buaipuiah a puh a ni.

ZPM-in zirho
ZPM party chuan nimin khan Cultural Centre, Vaivakawnah 'Training on Capacity Building & Resource Mobilization' an buatsaih a; working president K Sapdanga'n kaihruaiin, president Lalliansawta'n thu a sawi a, hruaitu dangte'n thil pawimawhte an zirtir a ni.