AR rama mimal LSC-te tihtawp a nih theih nan Central YMA-in an bawhzui

Central YMA hruai­tute chuan nimin khan Land Revenue & Settle­ment (LRS) minister Lalruatkima chu a pisa­ah an kâwm a; Aizawl khawpuia Assam Rifles ram luah chhunga mimal ram neite LSC tihtawp (cancel) a nih theihna tura Guwahati High Court-a public interest litigation (PIL) an thehluh chungchang an sawipui.

CYMA hruaitute chuan, Assam Rifles ram luah chhunga dan loa LSC pekte titawp tura kum 2019 tir lama Cabinet meeting-in hmalak a remti tawh chu lawmawm an tih thu an sawi a, "AR-te'n an chhuahsan tur ram hi mimal hnena pek leh sahthlak CYMA chuan rem a ti ngai dawn lo a, Mizo mipui tana thil ṭha leh ro tling siam nan a tàwp thlenga beih kan tum," an ti.

Joint NGO Coordi­nation Committee pawhin hun kal tawhah AR ram luaha mimal ram neite chu sorkarah pe lêt (surrender) turin an ngen tawh tih sawiin CYMA hruaitute chuan, "Kan ngenna a hlawhtling loa kan hriat avangin kum 2020 khan High Court-ah PIL kan thehlut. Rei lo têah court hearing a nih kan beisei," an ti a; LSC neih dan a felfai loa an hriat thu leh, mimal LSC-te titawp turin sorkarin tun aia sâwt zawka hma a lak theih dan a awm an beisei thu an sawi bawk.

Minister Lalruatkima chuan, hun rei tak aṭang tawhin chief secretary awm tawhte kaihhruaina hnuaiah LRS department leh Home department-in hma an lâk tawh thu a sawi.

LRS Minister chuan, "Mimal leh páwl anga kan duh dan leh ngaihdante dah bo a, ram leh hnam tan a ni tih hriaa a ṭha tur ber thlir chunga rilru zau tak LSC neitute leh CYMA bakah, sorkar pawhin kan put theih a pawimawh," a ti.

Lalruatkima chuan, sorkarin hmathlir thui tak neiin AR chhuahsan tur ram chu ṭhangtharte leh Mizoram tana ro tling ni tura tuaihnûm a duh tih sawiin, "Hemi hre reng hian LRS department pawhin session kal lai mekah Assembly House-a ngaihtuah turin The Mizoram (Restriction on Use of Transferred Lands) (Amendment) Bill, 2023 a pu lut a ni," a ti bawk.

CYMA hruaitute hi president R Lalngheta hoin an thawk chhuak a; LRS Minister hi LRS secretary R Zarzosanga leh director K Laldingliana bakah, hotu dangte'n an ṭawiawm a ni.