House-ah mi pathum sûn a ni

Nimin Assembly session-ah tun ṭum session leh session hnu­hnung ber inkara thi MLA ni ṭhin pathum - Lalhmingthanga, R Khaw­puithanga leh Lalrinawma te sûnna hun hman a ni.

MLA hlui pathumte chanchin leh uina thu chief minister Zoram­thanga'n a sawi a; mem­ber dang - Tawnluia, Dr R Lalthangliana, Lal­chamliana, Lalrintluanga Sailo, Lalduhoma, Zodin­tluanga Ralte, Vanlalhlana leh KT Rokhaw ten uina thu an sawi bawk.

Member-te'n uina thu an sawi hnuah spea­ker Lalrinliana Sailo kaihhruaiin mi pathumte sûn nan House member-te ngawi rengin minute khat chhung an ding a ni.

Lalhmingthanga hi June 9, 1940-ah Vanhne khuaah a piang a, MLA atan ṭum ruk thlan tlin a ni. Deputy chief minister, minister leh opposition leader-te a ni tawh. A upat hnuah natna hrang hrangin a tlâkbuak a, November 2, 2022 zanlai dar 12:40 a thi.

R Khawpuithanga hi March 1, 1941 khan North Mualcheng khuaah a piang a, kum 2003 inthlanpuiah MNF ticket-in Aizawl South-II bial aṭangin MLA atana thlan tlin a ni a, chief minister political adviser-ah dah a ni. December 15, 2022 khan chatuan ram a pan.

Lalrinawma hi De­cem­ber 28, 1947-ah a piang a, kum 1987 khan inthlanpuiah MNF ticket-in North Vanlaiphai bial aṭangin MLA atana thlan tlin a ni. Amah hi chuap cancer a ni a, January 26, 2023 khan a thi a ni.