Tuirial HEP-a dik lo taka zangnadawmna dawngtute hremna tur Court-in a puang

Tuirial Hydro Electric Power project (HEP) siamnaa ram lâkah dik lo taka zangnadawmna latu mi parukte chu Special Court (Prevention of Corruption Act) chuan kum khat ṭheuh tâng tur leh Rs 20,00,000 ṭheuh chawi turin a hrem. Ram lakna tura ram pass lem 49 siama zangnadawmna pek zat chu Rs 2,00,56,475 a ni.

Thiam loh chang mi parukte chu - C Vanlalchhuana, Electric Veng, Aizawl, Saiaithanga, Tuithiang, C Rokhumi, Durtlang, Lalduh­awma, Durtlang Leitan, K Lalrawna, Champhai Bethel Veng, PC Lalṭhazovi, Durtlang Leitan leh K Darkunga, ITI Veng te an ni. Zangna­dawmna buaipuitu sorkar officer H Lianzela, MCS leh Saipum VCP hlui Lalrinsanga te erawh chu thiam chantir an ni thung.

Tuirial HEP zangnadawmna thubuaiah hian thubuai nei mi pakua zinga paruk chu special judge (PC Act) Dr HTC Lalrinchhana'n February 7, Thawhlehni khan thiam loh a chantir tawh a, Court thutlukna puan zawh veleh jail-ah hruai nghal an ni. Nimin khan Court-ah an inlan leh a, anmahni hremna tur chu chawhnu dar 2 velah Special Judge-in a puang.

Thubuai hi Central Bureau of Investigation (CBI)-in an chhui a; thiam loh chantira hrem zinga mi C Vanlalchhuana s/o Darphunga (L), Electric Veng, Aizawl hi chief minister Zoramthanga unaupa a ni.

Mi parukte chu IPC Section 420 (120B en telin) hnuaiah kum 2 ṭheuh táng tur leh Rs 10,00,000 ṭheuh châwi tura hrem an ni a, pawisa chawi tur an chawi loh chuan kum 5 dang an tàn belh ang.

IPC Section 467, 468 leh 471 (120B en telin) hnuaiah kum 2 ṭheuh táng tur leh Rs 10,00,000 ṭheuh chawi tura hrem an ni bawk a; pawisa chawi tur an chawi loh chuan kum 5 dang tàn belh tura tih a ni bawk.

Court chuan thubuai chi hniha an tàn hun tur hi con­current-in a kaltír a, thubuai chi hniha an tàn hun tur chu belh khawm loin, thubuai chi khata an tàn hun tura tihah tlâk turin a ti a; zahngaihna lantir bawkin, tun hmain court-ah thiam loh chantirna thubuai an la neih loh vang te, kum upa lam tawh an nih avang leh natna eng eng emaw neite an nih hlawm avangin kum khat ṭheuh táng turin a hrem a ni.

Pawisa chawi tur erawh chu consecutive-a kaltir niin, thubuai chi hniha an chawi tur zat chu belh khawm a ni a; thubuai chi hnihah Rs 10,00,000 ve ve cháwi tura tih an nih avangin Rs 20,00,000 an chawi a ngai dawn a ni. 

Tuirial HEP siamna tura ram lâkah hian zangnadawmna diltu mi 352 an awm a, diltu zinga mi 303 chu ram neitu dik tak an nih laiin, mi 49 erawh chu ram pass lem hmanga dilna a ni tih hmuh chhuah a ni. Pass lem 49-a zangnadawmna pek zat chu Rs 2,00,56,475 a ni a; chu'ng pass lem siamnaah chuan inhnamhnawihah mi pakua puh an ni a, paruk chu thiam loh chantirin hrem an ni ta a ni.

Court chuan Tuirial HEP atana ram lâka zangnadawmna dik lo thubuai a lâk thutak chhan tarlangin, "Ram lâk thua zángnadawmna felhlel hmanga pawisa dawn hi Mizoram chhunga thil man sang uchuak tak thlentirtu chhan pakhat a ni a, Mizoram eibàr, sumpai mai bakah, mimal chhungkaw khawsak nunphung pawh a nghawng tel a ni," a ti.

Court chuan, "Thawhrimna rah mausàma pawisa awlsam/pawisa thlâwk hmanga mihring nun hman hi natna chi khat, khawtlang nun mai bakah mimal rinna thlenga nghawng chhe tak nei thei a ni," a ti a; politics hri chhia hmanga sorkarna fawng vuantu political party-te'n thuneihna an hman sual chu India ram mipui rorelna ṭhat tâwk lohna pakhat a ni tih hun kal tawh aṭangin zir chhuah theih a nih thu a tarlang.

Mizoramah sorkarin ram a lâk dawnin ram inleisak leh hralh a hluar hle tih tarlangin Court chuan, "Chu chuan mipui sum awmze nei loin, mi hausa duhâm tak tute emaw pawisa ipah a luhtir ṭhin a, ram hmasawnna hmelma a ni ngei a, chu chu thuneitute'n kan do ngam a ṭul. Chutiang a nih loh chuan hma lam hun thim tak kan hmachhawn mek tihna a ni ang," a ti bawk.