Vairengte - Kolasib ah Zangnadawmna mi 480 hnenah vbc. 281.73 pe tawh

Parliament session neih mekah Rajya Sabha MP K Vanlalvena zawhna nimin khan Road Transport & Highways minister Nitin Jairam Gadkari-a'n a chháng a; Silchar-Aizawl kawngpui thlúr lía siam tura Vairengte leh Kolasib inkara ram lakah mi 480 hnena zangnadawmna cheng vbc. 281.73 pek a nih tawh thu a tarlang.

Nitin Gadkari hian Mizoram hmun hrang hranga National High­ways Infrastructure Development Corporation Lt. (NHIDCL) hnuaia kawng laih hna thawh mek leh a kaihhnawih thil pawimawhte ziakin K Vanlalvena a chháng a; Silchar-Aizawl kawngpui zauh tumah Vairengte leh Kolasib inkar bikah mi 480 hnenah zangnadawmna cheng vbc. 281.73 pek a nih tawh thu a tarlan rualin, "Kolasib-Sairang inkarah chuan zangnadawmna tihfel a la ni lo," a ti.

MoRTH Minister tarlan danin, Silchar-Aizawl thlúr lía siam tur chu hlâwm (package) pariatah ṭhen a ni a, package pariat zinga pahnih chu Assam lama awm NHIDCL kutah dah niin, package paruk chu Mizorama awm NHIDCL kutah dah a ni.

Silchar-Aizawl NH kawngpui zauh tura package pariat zinga Mizoram chhunga dah package paruk zinga pali-ah hna thawktu tur contractor thlan a ni tawh a, chu'ng atana sum pek tawh chu vbc. 2,369.35 a ni. Package dang pahnih, Kawnpui leh Sairang inkar zauh turah detailed project report (DPR) siam mek a ni thung.

Mizoram chhungah NH kawngpui pali laih mek a ni a, chu'ngte chu NHIDCL hnuaiah contractor hrang hrangin an thawk mek tih tarlan a ni bawk.

Tun ṭuma Parliament session bikah hian nimin thleng khan MP K Vanlalvena zawhna zinga paruk chu ziakin minister-te'n an chháng tawh a ni.