April-ah a thlàwna thisen pek 96%

Association for Voluntary Blood Dona­tion (AVBD), Gen. Hqrs. thuchhuah siamin, inkhârkhip lai ni mah se, April 2020 chhung khan Mizoram puma thisen pek zawng zawng zinga 96% chu damlo pek bik nei lo, a thlawna pek (voluntary donation) a nih thu an tarlang a; thisen petute zawng zawng chungah an lawm thu an sawi.

AVBD chuan, Covid-19 hri léng vanga Mizoramin harsatna nasa tak kan tawh mek laia damlote tana thisen pe tura AVBD-in a sawmna ngai pawimawha kohhran ṭhalai pawl te, NSS volun­teer te, tlawmngai pawl dangte leh mi 

ṭha­­hnemngai eng emaw zatin thisen an pe tih an sawi a, "Hei vang hian inkhàrkhip chhungin thisen tlâkchham awm loin district hrang hrangah damlote ma­mawh thisen pek chhuah theih zel a ni," an ti.

An tarlan danin, Mizoram pumah April thla chhunga voluntary donation chu 96% a tling a, inkharkhip chhung bikah, May 14, 2020 thlenga thisen pek zawng zawng chu unit 1,843 niin, chu'ngte chu mipa 1,533 leh hmeichhia 418-te'n an pek a ni.

Aizawl bikah chuan blood bank pahnih - Aizawl Civil Hospital leh Synod Hospital-ah a awm a; hengahte hian mipa 1,026 leh hmeichhia 172-te'n thisen unit 1,198 an pe a ni.

AVBD chuan, "District hrang hranga blood bank staff-te leh thisen petu zawng zawng chungah lawmthu kan sawi tak meuh a ni," an ti.