Assam-in min la tibuai reng - Duhoma; Ramri chinfel hi thil harsa tak a ni - CM

ZPM Legislature Party (ZLP) leader Lalduhoma chuan, Mizoram leh Assam sorkarin ramriah intibuai tawh lo turin inremna siam mahse Assam lamin Mizoram an la tihbuai reng thu nimin khan Assembly House-ah a sawi. House leader Zoramthanga chuan, ramri chinfel chu thil harsa tak a nih thu a sawi thung.

Lalduhoma chuan, nikum kum tawp lam leh kumin tìrah ringawt pawh Assam-in Mizoram chhungah harsatna an siam fo thu sawiin, kumin January-ah Aitlanga hmunphiah chíngtute'n an hmunphiah an keh ngam loh thu leh an huan kal turin ID card siamsak hial an ngai tawh a, Assam-in Aitlang chu an ta chei tawh thu a sawi a ni.

Assembly session-a Governor thusawiah ramri issue tak tak a lang lo chu pawi a tih thu sawiin Duhoma chuan, "Ramri buaina chungchangah kum 2018-ah Home Ministry-in Chief Secretary hnenah ramri chungchanga report thehlut tura a dilin Mizoram sorkarin a chhang lo a, vawi li ngawt reminder a thawn chung pawhin ramri chungchangah chhanna a thehlut lo a ni," a ti.

ZLP Leader chuan, Mizoram sorkarin hun rei tak ramri pawm chin a neih loh thu House-a zawhna an chhannaah an sawi tih sawiin, July 8, 2019-ah ramri pawm chin a neih chauh thu a sawi a; ramri chinfel kawngah rawtna a neihte a sawi bawk.

CM Zoramthanga chuan, ramri chungchanga Lalduhoma thusawite chu ramri ngaihtuah tura ruatte'n hlâwknaah an hman a beisei thu a sawi.

Zoramthanga chuan, ramri chinfel chu thil harsa tak a nih thu sawiin, "Ramri thu hi chu chinfel a va har tak em. Zâwi zâwiin, a theih ang chin chin chinfel kan tum zel ang a, vawi leh khatah chinfel theih a ni lo," a ti a; party sawi loin theihtawpin an ṭang tláng ang a, chinfel a la nih ngei a beisei thu a sawi a ni.

Chief Minister chuan, "Kan duh tak chu a awm a, hmâna kan duhte pawh kha han sawi fel chiah ila, kan ramri duh hmasak kha min pe dawn se chu a chhunga chengte nena lâk tel dawn tak tak chuan kan duh loh laite pawh a awm thei. Party aiawhte leh ramri buaipuitu committee-te'n thiam tak leh zei taka an chhawp chhuah a ngai. A chinfel dan readymade formula vawi khata hman mai a harsa a ni," a ti.