Mimal hnaa police chhawr titawp turin MPYCC-in Home Minister an ngen

Mizoram Pradesh Youth Congress Committee (MPYCC) chuan, Mizoram Police-a hotute'n an mimal hnaa an hnuaia mi police-te an chhawr ṭhin titawp turin Home minister Lalchamliana an ngen a; ngenna lehkha nimin khan an thehlut.

MPYCC chuan, Police department-ah hotute'n an mimal hnaah an naute chu an hna pangngai (official duty) piah lamah chhawr an chíng leh tawh tih tun hnaiah an dawn thu an ziak a, "Hetianga mimal thila inchhawr hi ṭha lo kan ti hle a, a rang thei ang bera tihtawp a nih theih nan a ṭul anga hma la turin kan ngen tak zet a che," an ti.

Congress party-in sorkarna an chan laia Home minister R Lalzirliana hoin mimal hna thawk tura police chhawr khap a ni tawh ṭhin tih sawiin MPYCC chuan, "An hna pangngai baka inchhawr ṭhin pawh sawi tur a awm lo hle tawh a nih kha. Amaherawhchu, dan leh thupek kenkawh kawngah sorkar a inthlahdah em avang hian mimal hna thawk tura police-te chhawr hi tun hnaiah hriat tur a lo awm leh ta a, pawi kan ti tak zet a ni," an ti a; inchhawr luihna tihtawp a nih ngei theih nan a ṭul ang zela hma an lâk zel dawn thu Home Minister an hrilh bawk.

Congress ṭhalaite hian Home Minister hnena lehkha an thehluh hi a copy Director General of Police Devesh Chandra Srivastva hnenah an pe tel a ni.