HSLC/HSSLC exam turte tibuai zawnga awm lo turin mi tin ngen

Mizoram State Commission for Protection of Child Rights (MSCPCR) chuan thuchhuah siamin, HSLC leh HSSLC exam a hnaih tawh avangin zirlaite'n nuam ti tak leh hrehawm ti loa exam an hmachhawn theih nan anmahni tibuai thei leh tihnual thei zawnga awm lo turin mi tin an ngen.

MSCPCR chuan, zirlaite'n exam an hmachhawn dawnin zâmna leh hlauhthawnna nasa tak an nei thei tih tarlangin, "An zirlaite thlamuang tak leh bawhbuaitu nei loa an zir theih nan zirtirtute leh nu leh pate'n ruahmanna fel tak siam a, hun leh hmun nuam kan siamsak thiam a pawimawh. An zirlai atana an inbuatsaihna tibuai thei leh an rilru tihnual thei thil an tawn loh a pawimawh em em a ni," an ti.

Lehkha zirnaah naupangin harsatna a tâwk a nih chuan phone number 6009888804-ah phone call/SMS/ whatsapp hmanga biak theih an nih thu MSCPCR chuan a tarlang.