State Nutri-Garden Award sem a ni

Social Welfare & Tribal Affairs (SWTA) leh Women & Child Development (WCD) department chuan nimin khan Vanapa Hall-ah State Nutri-Garden Award an sem a, SWTA minister Lalrinawma'n hmanpui.

Award semna inkhawm hi Social Welfare secretary Arun Mishra-a'n a kaihruai a; Minister-in award dawngtu mi panga hnenah lawmman a sem bakah, mi 33 hnenah District Nutri-Garden Award a sem. State Nutri-Garden lawmman pakhatna dawngtu chu Kolasib Anganwadi Centre XII-a anganwadi worker Vanlalchhuangi a ni.

Lalrinawma chuan, rim taka an thawh rah mipuiah a lang chhuak mek tih sawiin, "Naupang chawṭha ei lote kan nei tlem tial tial a, Poshan Abhiyan hi department pakhat hmalakna vanga hlawhtling thei a ni lo a, kan thawhpui department hrang hrangte nena kan thawhhona vang a ni a, a ropui hle," a ti a; mipui nen thawhho thiam a pawimawh thu a sawi.

Anganwadi-ah nutri-garden hmasawnna nasa tak a awm tih sawiin Minister chuan, "Anganwadi centre 1,638 velin nutri-garden an siam thei hi a ropui a, nutri-garden an la nei mumal thei lo centre 606 velte'n nasa taka hma an lak thar a ṭul," a ti.