SEDP-a Rs 3,00,000 tiama Rs 25,000 sem eptu MLA-te'n ngaimawh

Assembly budget session ṭan nía Governor thusawi nimina sawihonaah eptu MLA-te'n Socio Economic Development Programme (SEDP) kalpui dan leh ṭanpuina sem dan an ngaimawh thu an sawi.

ZPM member C Lalsawivunga chuan, MNF-in kum 2018 inthlan dawnah thlan tlin an nih chuan Rs 3,00,000 sem an intiam thu a sawi a, "An intiam ang ngeiin SEDP hi sem rawh se. SEDP hi mipuiin an dil miah lo a, sorkar zawk hi a intiam a, a intiam ang hi a tihlawhtling tur a ni," a ti.

BJP member Dr BD Chakma chuan, Rs 3,00,000 sem tiamtute'n kum li an sorkar hnuah Rs 25,000 chiah an la sem thu a sawi a; second instalment sem leh tum pawh Rs 25,000 chiah a ni a, an intiamna nen a inpersan avangin SEDP chu hlawhchham let dêrah a puh.

Tuichawng bialtu MLA chuan, sorkar hnathawkte hlawh la tlai ṭhin chuan nghawng nasa tak a neih thu sawiin, a bikin loan latute'n harsatna an tawh nasat avangin a hun taka hlawh pe tawh turin sorkar a phût a ni.

Aizawl West-III bialtu MLA VL Zaithanzama chuan, tun hnaia kut hnathawktute thil thar ṭhahnem takte SEDP avanga thar anga Larsap thusawia lang chungchangah, SEDP awm hma daiha chìn tawh a nih thu a sawi a; "SEDP vanga hlawhtling ang ziazânga sâwngbâwl hi chu a dik lo," tiin, Sialhawka lakhuihtheite chu kum 10 dáwn kal taa bul an ṭan a nih thu a sawi.

INC member Lalrindika, Hachhek bialtu chuan, MNF hruai sorkar, mipuiin an nghahhlelh chhan chu SEDP a nih thu leh chu chu sorkarna an chan chhan pawh a nih thu a sawi a, "Chutih laiin, an term tàwp dawn kum khat pawh a awm tawh lo tihah SEDP vanga chhungkaw hlawhtling inkawhhmuh chu sawi loh, first instalment pek dan an la sawi laih laih hi a fel lo a ni," a ti.

Lalrindika Ralte chuan, "Mipui beiseina siama tihhlawhchham hi a pawi a, beiseina tihkhawtlai ringawt pawhin mi rilru a na thei a, beiseina hlawhtling lo hian mipui rilru a tihnat dan tur hi hriatthiam phâk a ni lo," a ti a; Rs 3,00,000 sem an intiam anga sem ngei turin sorkar a phût a ni.

INC member dang KT Rokhaw, Palak bialtu chuan, MNF-in MLA 28 an neih theih chhan chu SEDP-a Rs 3,00,000 sem an tiam vang a nih thu sawiin, "Chutih laia sorkar kum nganaa chhungkaw 60,000 lek hnena Rs 25,000 an sem thei chauh hi lawmna tur a awm lo," a ti. SEDP dawngtute chu MNF vek an nih thu te, Congress sorkar chuan Rs 1,00,000 sem an tiam anga an pek thu leh party dangte pawhin an dawn thu a sawi bawk.

ZPM member Vanlalhlana chuan, SEDP chu inbumna a nih thu sawiin, "Rs 3,00,000 sem intiamin mipui an bum a, tunah Rs 25,000 chiah an sem leh si," a ti a, MNF sorkar chu mipui bumah a puh.

Lawngtlai West bialtu C Ngunlianchunga chuan, MNF-in an sorkar tirh aṭangin SEDP kalpui tura an insawi laiin tun thlengin an la kalpui lo niin a sawi a, "Kum 2019-a Covid-19 a lên hmaa SEDP pilot project atana an thlante pawhin tun thlengin Rs 3,00,000 an la dawng kim lo," a ti.

Congress Legislature Party leader Zodintluanga chuan, sorkarin a intiam anga SEDP a kalpui lo chu demin, "SEDP hi an tlin chhan a ni a, SEDP bawk hi sorkar tlak lehna tur hmahruaitu a ni. Rs 25,000 an sem pawh hi CM-in a hmanna tur awm sain an sem tur thu a sawi tawh laiin tunah chuan a hmanna tur pawh awm loin an thei sem mai mai a ni," a ti.