Deputy Speaker-in pisa luah ṭan

Mizoram Legislative Assembly deputy speaker atana thlan thar H Biakzaua, Lawngtlai East bialtu MLA chuan nimin khan deputy speaker pisa a luah ṭan a, deputy speaker 17-na a ni.

Deputy speaker pisa luah ṭanna pual hian inkhawm tawi buatsaih a ni a; hmanpuitu chief minister Zoramthanga chuan, deputy speaker atan H Biakzaua thlan a ni chu lawmawm a tih thu sawiin, "Politics-ah tawnhriat ngah tawh tak a ni a, he hna hi a tlin pawh kan ring a, a lawmawm kan ti a, thinlung tak takin kan lawmpui a ni," a ti.

Pisa thar luah ṭanna inkhawm hi Assembly secretary Lalhmahruaia Zote-in a kaihruai a; speaker Lalrinliana Sailo, deputy chief minister Tawnluia, minister leh MLA dangte an tel a ni.

Mizoram union territory a nih aṭanga chhiarin H Biakzaua hi deputy speaker 17-na a ni a, state a nih hnu aṭanga chhiarin 12-na a ni thung.