MJA-te'n ramri vengtute an tlawh
MJA, Kolasib district member-te chuan May 16, Inrinni khan Covid-19 laka invenna atana Kolasib district chhung - Phaisen, Buhchangphai, Bairabi, Vairengte, Phainuam leh Saihapui-V khuaa ramri vengtute an tlawh a; duty-te hmalak dan leh an harsatnate an ngaihthlaksak.
Kolasib MJA-te hi team pahnihah an inṭhen a; task force duty-te chuan, hripui léng lakah Mizoram a him zel theih nan theihtawp chhuaha hma an lak thu leh, a ṭul anga hmalak zel an inhuam thu te, inkharkhip phelh a nih hnuah pawh nasa zawka hmalak a ngai a nih pawhin ram leh hnam tana theihtawp chhuah zel an inhuam thu an lo hrilh.
MJA-te tarlan danin, Bairabi-ah ramri vénga duty-na hmun 30, Buhchangphaiah hmun pali, Phaisenah hmun panga, Saihapui-V khuaah hmun pahnih, Phainuamah hmun pahnih leh Vairengteah hmun 13 a awm. Hmun eng emaw zatah chuan police-te nen an duty ho a ni.
Bairabi leh Vairengte task force-te chuan, an duty-na hmun chu Innerline Forest Reserve huam chhung a nih avangin Assam aṭanga Mizoram luh khan a tam a, a hautak phah thu leh, Zophaia Mizoram IR police duty-te Assam police-te nen an inawm pawlh chu fel tâwk loa an ngaih thu an sawi.
Vairengte-I duty-te chuan, an duty-na bul velah Assam Forest lam mi an lan fo thu leh chutiang hunah chuan an duty pui Mizoram police-te chakna an hman ṭangkai fo thu an lo hrilh.
Phainuam-a duty-te chuan, zan lamah êng an neih ṭhat loh avangin harsatna an tawh ṭhin thu an sawi a; Phaisena ramri vengtute chuan, harsatna an tawh ber chu inbiakpawhna ṭha lo a nih thu leh, May 13 aṭangin Kolasib District Voluntary Force aṭangin Kolasib Ṭumpui Branch YMA member-te'n duty post pathumah an chhâwk thu an sawi.
Kolasib district MJA member-te hian task force duty-na hmun kilkhawr tak takte an tlawh a; ramri an venna hmun ngeia thuthar thehdarhtute'n an tlawh chhuak chu an lawm thu, duty-te'n an lo hrilh ve bawk.