Khua/veng ṭhenkhatah total lockdown

The Grand Hotel, Chanmaria Covid-19 vei hmuh chhuah a nih avangin Pathianni zan khan veng pathum - Zarkawt, Chanmari leh Bawngkawn vengte'n an huam chhungah total lockdown an puang a; Pathianni chhun aṭangin Falkland leh Aizawl Venglaiah total lockdown puan a ni tawh thung. Pathianni zan aṭangin Khanpui khua pawhin total lockdown hi an puang.

Chanmari Local Task Force (LTF) chuan thuchhuah siamin, "Covid-19 positive Chanmari veng chhungah hmuh a nih tâk avangin kan veng chu containment zone kan nih angin total lockdown a ni. Sorkar hnathawk leh mimal hnuaia thawkte pawh chhuak lo turin kan inhriattir a, total lockdown hi office leh mahni ruaitute hnenah pawh hriattir tur a ni. Lockdown vanga ruaitu leh hotute aṭanga harsatna tâwkte chu Covid-19 dan tlawhchhanin a ṭul angin hmalak a ni ang," an ti.

Zarkawt LTF chuan, an veng ṭhenawma Covid-19 vei hmuh chhuahte'n an venga hmun/dawr ṭhenkhat an tlawh avangin August 3 aṭangin thu leh awm hma chu ma­gistrate hriatpuiin an vengah total lockdown puan a nih thu an tarlang. Zarkawt LTF tarlan danin, total lockdown hian an venga office, bank, infiamna hmun leh sumdawnna hmun zawng zawng a huam a, veng páwna hna thawk tura chhuah phal a ni lo. Kohhran zing ṭawngṭai inkhawm pawh chhunzawm loh tur a ni a, an venga motor tlân tlang turte'n veng chhungah mihring chhuktir leh city bus dinte pawh an khap a ni.

Bawngkawn LTF chuan, Grand Hotel-a thawk Covid-19 vei hmuhte nena inkungkaihna nei an veng mi a awm avangin August 2, 2020 aṭanga thu leh awm hma chu Aizawl DC hriatpuinain an veng chhungah total lockdown kalpui tur a nih thu an tarlang a, "Dawr, sumdawnna hmun, infiamna hmun leh hnathawh phal a ni lo. Mipuite páwna chhuah loh tur a ni. Bawngkawn veng chhungah lirthei din phal a ni lo a, kaltlang turte pawh lirthei nen chauh kaltlang tur a ni," an ti.

Falkland Veng pawhin Pathianni aṭang khan an huam chhungah inkharkhip an puang a, an puan chhan chu sipai pakhat leh an venga mi gate aṭangin thil an inpe a, sipai hi a hnuah Covid-19 vei tih finfiah leh a ni. Khanpui Village Task Force pawhin Pathianni zan dar 9 aṭang khan an khuaah total lockdown an puang. Inkharkhip an kalpui chhan hi August 1, 2020-a Sakawrdaia Covid-19 hmuh chhuah enkawltute chhung­kua tlawhpawhtu Khanpuiah mi pahnih an awm vang a ni. Inkhàrkhip chhungin an khaw paltlang tur lirtheite chu Khanpuiah din khawmuan an phal lo. Aizawl páwn lamah chuan, Sairang leh Sakawrdaiah total lockdown puan a lo ni tawh bawk.