Rs 25,000/50,000 hlawhtlinpui tham a ni lo, la pek belh zel kan tum - Chief Minister

Nimin Assembly session-ah Planning department. changtu chief minister Zoramthanga chuan SEDP hnuaia an sum sem leh la sem tur chu hlawhtlinpui thama an ngaih loh thu sawiin, "La pek belh zel kan tum," a ti.

ZPM member C Lalsawivunga chuan SEDP kalphung tur Planning dept.-in an tarlanah 'hlawhtlinpui tham ngei turin kalpui a ni ang' tia ziah a nih thu sawiin, "Rs 25,000/50,000 hi hlawhtlinpui thama ngaih a ni em?" tiin a zawt a ni.

Chief Minister chuan, "Rs 25,000 hlawhtlinpui tham a ni lo, financial year khata kan pek tur chanve, 1st instalment chauh a ni. 2nd instalment Rs 25,000 kan pe leh dawn a, Rs 50,000 a ni dawn. Chu pawh hlawhtlinpui thamah kan ngai lo a, pek belh zel kan tum," a ti.

Chief Minister sawi danin, 1st instalment dawngte chu 2nd instalment pek leh vek an ni dawn. Heng mite hi financial year tharah pek belh tum an nih bakah, SEDP dawng thar tur sing bi thlan leh tum a ni.

SEDP pawisa chhungkaw 59,996 hnenah Family Oriented SEDP (Phase-I) 1st instal­ment sem a nih tawh thu sawiin Zoramthanga chuan, "Chhung­kaw pali la pek lohte hi Tourism dept. hnuaia tourist guide trade thlang an ni. Tourism dept.-in training an buatsaih hunlaia training hman ve lote an ni," a ti a, training buatsaih leh thuai tum a nih thu a sawi.

SEDP dawngtute training pek an nih leh nih loh zawhna chhangin Chief Minister chuan, "Family Oriented SEDP atan hian implementing department pakua an awm. Anni hian an hnuaia trade item thlang chhungkuate an trade thlan mila hma an lak theihna atan training hi an buatsaih a ni," a ti.

SEDP implementing depart­ment-te chu - Agriculture, Horti­culture, AH & Vety, Fisheries, Sericulture, Soil & Water Conser­vation, Commerce & Industries, UDPA leh Tourism-te an ni.

ZPM member Vanlalhlana chuan implementing depart­ment-in training an pek loh thu sawiin, "MNF party-in training an pe, a dawng turte an kokhawm a, a nihna takah chuan campaign na atan an hmang," a ti.

Chief Minister chuan imple­menting department-te'n training an pek chungchang a sawi leh Vanlalhlana'n training chungchang a sawi chu thil inang a nih loh thu sawiin, implementing department-ten a ṭul angin an department hnuaia trade thlangtute chu an puih zel tur thu House a hrilh.