KHAWTHLIR

Dan zawm lo 11,313 man
ZPM member Vanlalhlana zawh-na chhangin Trans-port minister TJ Lalnun-tluanga chuan, kum 2022 chhung khan Transport department-in lirthei dan zawm lo mi 11,313 an man thu House a hrilh.

DC-in chhuak turin hriattir
Serchhip district bawrhsap Nazuk Kumar chuan Aizawl - Tuipang inkar NH 54 kawng laih zauhna tura ram lâk tur huam chhunga awm zinga zangnadawmna pek tawhte chu kawng zauh hna chak zawka kalpui a nih theih nan February 8 - 21, 2023 chhungin an in leh lo ṭhiah ngaite ṭhiat a, kawng siam hna ṭan a nih theih nan chhuahsan vek turin a hriattir.

YMA-in hlan
Tuikual South Branch YMA chuan nimin khan an din champha vawi 34-na denchhenin an venga Motherless Babies Home leh Tuikual Rescue Centre-ah buh-fai, alu, dal, artui leh bawnghnute an hlan. Tuikual Branch YMA ni ṭhin chu kum 1989 khan Tuikual South leh North Branch YMA-ah ṭhen a ni.

Bill pass
Nimin Assembly session-ah Land Revenue & Settlement (LRS) minister Lalruat-kima putluh 'The Mizoram (Restriction on use of Transferred Lands) (Amendment) Bill, 2023' chu sawiho a nih hnuah lungrual taka pass a ni.

Silai nena ram kal khap
Lunglei district bawrhsap Ramdinliani chuan kangmei laka mihring, nungcha leh ramngaw a him theih nan kangmei chhuah awlsam hunlaiin Lunglei district-ah silai nena ram kal a khap. Thupek hian thla hnih chhung a huam dawn a, thupek zawm lote chu IPC Section 188 hmanga hrem an ni ang.

In 98,461 tui pe tawh
MNF member Ramthanmawia zawhna chhangin PHE changtu dy. chief minister Tawnluia chuan, JJM hnuaiah Mizoram pumah in 98,461 tui connection (FHTC) pek a nih tawh thu leh pek hmabak in 34,599 a la awm thu House a hrilh.

Bawrhsap thlah
Lawngtlai district bawrhsap kal chhuak tur Amol Srivastava, IAS chu February 8, Nilaini khan DC conference hall-ah Lawngtlaia sorkar hotute'n thlahna hun an buatsaih a, ngaihhruina thilpek an hlan. Amol Srivastava hian May 20, 2022 khan Lawngtlai bawrhsap hna a zawm a, tunah hian Mizoram sorkara Disaster Management & Rehabilitation department-ah additional secretary hna a zawm dawn a ni.

Assam DC-te sawm rêl
Kolasib District Chapchar Kût 2023 Organizing Committee chu an chairman John LT Sanga, district bawrhsap kaihhruaiin nimin khan DC conference hall-ah an ṭhukhawm a; Chapchar Kût chu Ṭumpui khelmualah hman ni se, Kût Pa atan bialtu MLA K Lalrinliana, minister sawm ni se, an ti. Assam state nen inlaichinna ṭha siam nan Hailakandi, Cachar leh Karimganj DC-te Kût lawmnaa tel tura sawm an rêl bawk.