Zu kaihhnawih thubuai a pung

Nimin khan inspector general of police (Law & Order) LH Shanliana hoin Aizawl SP pisa conference hall-ah police officer-te'n Covid-19 donaa police hmalakna an thlir lêt. Inkharkhip vangin zu leh a kaihhnawih thubuai ziah luh a tam phah thu tarlan a ni.

IGP LH Shanliana chuan, state páwna Mizo tangkhangte an rawn haw mek avangin quarantine centre siam belh zel a nih thu sawiin, "Police-te duty-na hmun a pung zel. Khawthlang ramri véng turin police tirh belh a nih avangin police duty hmun tam takah sîksawi a ni. Indaih lo taka duty ni mah ila, fimkhur taka duty zel a ṭul," a ti a; SDPO, zonal officer leh OC-te chu field duty-te tlawh tam turin a chah.

Meeting-a tarlan danin, inkharkhip leh curfew vangin police station-ah thubuai ziah luh a tlem phah a; chutih laiin, zu leh a kaihhnawih bika thubuai ziah luh a pung thung.

Meeting-ah hian DIG pathum, SP pathum, commandant pathum, additional SP pathum, deputy SP 16 leh Aizawla police station officer-in-charge (OC)-te an tel a ni.