AR an insawn chhuak kim lek lek tawh - Zoramthanga
Chief Minister Zoram-thanga chuan Assam Rifles-te chu Aizawl khawpui laili aṭangin an insawn chhuak kim lek lek tawh tih nimina Budget Session-ah a sawi a; Covid-19 lên hmaa chhuak tura Home Ministry-in an tihna lehkha chu sût a la nih loh thu a sawi.
Zoramthanga chuan, "Covid-19 lên hma khan chhuak vek tura tihna order Home Ministry aṭangin an pe tawh a, sût a la ni lo a; nimahsela Covid-19 avang khan a chet theih ta lo a, kan ding ta ṭhup mai a ni," a ti.
Chief Minister chuan khawpui laili aṭanga AR an insawn chhuahna turin Mizorama AR Commander a sawipui bakah Home ministry lam pawh an biak pawh reng thu a sawi rualin, "Home Ministry lam hian a tak taka 'move' turin chhuanlam an ngah," a ti a; an chhuanlam hrang hrang - tui, electric leh kawngpui chu Mizoram sorkarin a siam zawh thawkhat tawh thu a sawi.
Zoramthanga chuan AR Commander thar chu insawn chhuah chungchang tun hnaiah vawi hnih a sawipui tawh thu leh, ani pawhin an headquarters lama Director General-ah a lo sawi chhàwn ve tur thu a hrilh tih House-ah a sawi a; Chief Minister hian Commander hnenah hian a tahtawla chhuak turin thurâwn a pek thu a sawi.
Hetihlai hian Chief Minister chuan sorkar laipui lam thu sawi chhawn chu dawt sawi palh a awl thu leh a thlen tak tak vek ṭhin loh thu a sawi chhuak a, "Keini aia thuneitu zawk an ni si a, a buaithlak khawp mai. Engpawhnise theihtawpin Mizoram sorkarin hma kan la," tiin Aizawl khawpui ṭanga Assam Rifles sawn chhuak tura an nawr zel thu a sawi.