Doctor sawnna thupek sût turin sorkar ngen

Lengpui Joint Commi­ttee chuan sor­karin Lengpui damdawi-in, public health centre (PHC)-a thawklai doctor pakhat sawnna tur thupek a chhuah chu sût turin sorkar an ngen a; "Hun rei tak pawh min awmchilh hmaa sawn chhuah leh mai hi hriatthiam har kan ti," an ti.

Lengpui Joint Commi­ttee chuan, February 3, 2023-a Health & Family Welfare department order No A.22012/14/2022-HFW/26 in doctor transfer and posting a tihchhuah zingah Lengpui PHC-a doctor thawklai, Dr Elsa Lalramzauvi Pachuau a tel thu an tarlang a, "Hun rei tak pawh la awm lo, sawnchhuah tura a rawn tichhuak thut mai hian khawtlang mipui leh he damdawi-in hmang ṭhintute min barakhaih hle mai a, he order hi min sût sak turin thuneitute kan ngen tak meuh meuh a ni," an ti.

Dr Elsa Lalramzauvi Pachuau chu khawtlang mipui hmangaiha, Lengpuia a hna riahchilh rengtu a nih thu tarlangin Joint Committee chuan, "Kan thla a ti muang em em a, thingtlang khawsak harsa tê tê kan ni chunga ama sum senga inenkawlna min tum sak fo ṭhinte hi kan tan a hlu a ni," an ti a, Lengpui PHC aṭanga sawn chhuah chu an remtih loh thu leh hei hi sorkar hotute pawhin hriatsak se an duh thu an tarlang bawk.