Zirlaite'n lungawi lohna lantir titawp Sorkar hmalak dan an en zui reng dawn

Hrangbana College zirlaite'n an college-a zirtirtu dah belh phûta ni hnih chhung lungawi lohna an lantir hnuah February 8, Nilaini tlai khan sorkar hotute nen inbiakna an nei a, lungawi lohna lantira Chanmari kawngpui an dan chu an titawp rih a, an harsatna chinfel kawnga sorkar hmalakna an en zui reng tur thu an tarlang.

HBC Students’ Union chuan thuchhuah siamin, an college faculty indaih lohna chungchanga lungawi lohna an lantirnaah February 8, Nilaini khan Higher & Technical Education Minister leh Secretary-te nen an sawiho thu an tarlang a, "HTE minister Dr R Lalthangliana'n kan harsatna tawhte sutkian a nih theihna tura hmalak meknaah 'Min ring ngam rawh u' a tih hi rintlakah ngaiin kan ring ngam a, chuvang chuan lungawi lohna kan lantir mek chu tihtawp rih a ni. Kan college harsatna tawh hi arang thei ang bera chinfel a nih theihna tura sorkar hmalakna hi kan en zui zel dawn," an ti.

An college-in zirtirtu indaih lohna avanga harsatna an tawh tihhlawhtlinna tura hma an laknaa mipui an tihbuaina zawng zawngah mipui hriatthiamna an ngen nghal bawk.

HBC SU hruaitute chuan Vanglaini palai zawhna chhangin, sorkar hotute'n hmalak an intiamna chu a hlawhtlin ngei an beisei thu an sawi a, "Kar leh aṭangin sorkar hmalak dan kan bawhzui char char dawn," an ti.

Tarlan tawh angin HBC SU chuan, contract-a thawk assistant professor-te January 27, 2023-a dah ngheh an nih hnuah HBC-a zirtirtu paruk sawn chhuah tura tih a nih laiin, zirtirtu pathum dah luh tura tih a nih thu an tarlang a; subject ṭhenkhatah February thlaa pension-a chhuak tur pahnih leh kumin chhunga pension tur eng emaw zat an awm tih tarlangin, "Mizoram sorkar hnuaia college zirlai tamna berah class lâk hleih theih loh khawpin professor kan indaih loh hle laia ngaihsak kan hlawh lo hi a pawi kan ti tak zet a ni," an ti.

College hrang hrangte dilna chungchanga February 2, 2023-a HTE dept. thuchhuah chu thu tlinga an ngaih loh thu tarlangin HBC SU chuan, "Sawn an nih hmaa college tinte mamawh mumal taka enfiahna sorkarin a nei lo hi a pawi kan ti tak zet," an ti a; college-in thawktu a mamawh dan zir chiang hmasa lo leh posting tharte hmun ruak awh tur a rang lama hnawh­khat turin sorkar an phût.