Siaha-ah MNF bansantu an tlem - MNF Vice President

MNF District Headquarters, Siaha chuan nimin khan New Siaha Bazarshed-ah street campaign an buatsaih bakah, chhunah an office-ah workers meet an buatsaih a, thusawitu MNF vice president Lalthlengliana chuan, "Media-a kan hmuh ang ni loin, Siahaah MNF bansantu an tlem," a ti.

Lalthlengliana chuan a hmunah kalchilhin, an banna an thehluh document-te a zir chian thu sawiin, "Social media-a kan lo hmuh ang ringawt ni loin Siaha-a MNF bansantute hi a takah an lo tlem hle a, MNF kan la tam filawr ber," a ti a, kum 2023 MLA inthlanah Siahaah leh Zoram pumah MNF an tlin leh ngei tur thu a sawi.

May 2022-a MADC inthlanah MNF-in vote 13,796 an hmu tih sawiin MNF Vice President chuan, "Tuna MNF chhuahsantute hi mi 90 vel chauh an lo ni. Tuna banna lehkha rawn thehlut tam ber hi a hma MDC inthlan laia kan party phatsantu leh kan party-ten party enrollment-a an telh loh party aṭanga hnawhchhuah sate an ni," a ti.

Lalthlengliana chuan anmahni eptu tlemtein an party beih nan leh mipui tih chiai nan thudik tawk lo an vawrh darh mai mai nia sawiin, "Tuna banna thehlut nia dawt an phuahchawp zat aia tam fe chu MNF-a lawmluh mai hmabak kan nei," a ti a, Siaha district-a ṭawngkam lar thar tak 'Go Ahead Party' te tih tham an lo awm loh thu a sawi.

MNF Vice President chuan MNF party aṭanga chhuak reng reng politics-a ding chhuak an awm lo nia sawiin, "ZPM leader Pu Lalduhhoma'n MNF a chhuahsan hnuah kum 35 zet politics a hlawhchham pui. Congress president Pu Sawta pawh MNF-ah kan MLA lo ni tawh, BJP President hi kan party-ah jt. secretary lo ni tawh, candidate chan loh avanga BJP-a lut a ni. MNF aṭanga chhuakin an hruai party-te hian sorkarna an siam ngai lo ang," a ti.