MICE School sak a nih danah Thil dik lo tam tak a awm - ZPM Ṭhalai

ZPM Ṭhalai hruaitute chuan nimin khan Mizoram Institute of Comprehensive Education (MICE) School, Tuikual South a mi an tlawh a, sikul sak danah thil dik lo tam tak an hmu chhuak niin an tarlang.

ZPM Ṭhalai chuan laboratory room tur chu bo hmakin, a chhawng hnuai bera room tih pum a ni lo tih tarlangin, "Retaining wall pawh hi a awm zat tur a awm kim lo niin kan hria. Tin, retaining wall hian school building a do vek tur nia a lan laiin, a ṭhen laiah chuan a beam chinah chauhte a do a, ruah sur huna tui hawk luanna tur leh tui chhe luanna tur hrim hrim tui luankawr engmah hmuh tur a awm lo," an ti.

School building chung berah railing (vawn bân) siam vek tur nia ngaih a nih laiin, railing hi hmun tam zawkah siam a ni lo tih tarlangin ZPM Ṭhalai chuan, "Hei hi naupang himna atan a derthawng hle niin kan hria. Toilet chungchangah pawh a nih tur ang a ni lo nasa hlein kan hria a ni," an ti a, floor tinah naupangten zunram thiarna an nei tur nia a lan laiin third floor-ah chiah toilet siam a ni tih an tarlang.

ZPM Ṭhalai chuan rikrum thila chhuahna tur (emergency exit) pawh siam a ni lo tih tarlangin, "Rualbanlote kalna tur siam tura ruahman a nih laiin, hetiang hi hmuh tur a awm hek lo. MICE school sak dan hi a ṭha tawk loa, bang a lai leh a sira khi chat a tam hle a, kawngkhar chokut-te pawh themlem te te hman a ni. Pawi kan ti hle," an ti.

MNF sorkârin contract hna chhe lutuk hlir an hlui nia tarlangin ZPM Ṭhalai chuan, "Mipuite hmuhsitnaah kan ngai. CBSE school kan neih ve chhun lehzel pawh hetianga phuailuaia min hlui duh sorkâr kan hrawn hi vanduaithlak kan ti," an ti a, MNF sorkârin zirna thu tak hla takah a ngaih lohzia a lang chiang hlea an hriat thu an tarlang bawk.