CS-in industry tun nunna tur a sawipui

Nimin khan chief secretary Lalnunmawia Chuaungo chuan a pisa-ah Mizoram chhunga bank hrang hrang hotute leh Mizoram Industry Owners Association (MIOA) hruaitute a pisaah kawmin Ministry of Micro, Small and Medium Enterprises (MSME) hnuaia industry neitute intunnunna tur Prime Minister’s Economic Package chungchang a sawipui.

Sorkar thuchhuah tarlan danin, Covid-19 avangin India ram chhung hmun hrang hranga industry neituten an tuar hle tih hriain sorkar laipui chuan suma harsatna tawk mek industry-te khaichhuahna turin ruahmanna Prime Minister’s Economic Package a siam a ni. He package hnuaiah hian MSME hnuaia loan account nei mekten dahkham ngai lo (collateral free) loan an la thei a ni.

Loan latute tan hian kum khat chhung rulh let a ngai lo a, kum khat ral hnuah thla 36 (kum 4) chhungin thlatin installment inang khatin an rul thei dawn a ni. Industry loan hi a tlangpui thuin 10.5% aṭanga 13% a sanga rulh a ngai ṭhin a, he special package hnuaiah erawh chuan 7.5% aṭanga 8.5% a sangin a rulh theih dawn a ni. Sorkar laipuiin he loan thar a duan hi vawi khata pektlak nghal ngai emaw ti mi eng emaw zat an awm avangin meeting-ah hian inhrilhfiah a ni.