Chakma foreigner-te hnawh chhuah An nih theihna atan hmalak rêl

MZP in Mizorama Chakma foreigners awmte hnawh chhuah an nih theih nan hmalak an rêl a; Mizo nunphung leh history a tam thei ang ber zirlaibuah telh a nih theih nan hmalak ni se, an ti.

Nimina MZP Special Assembly Vawi 66-na, Borapansury-a Zofate Chawlhbuk, Lawngtlai district-a neihah Mizorama hnam dang sumdawng, Chakma foreigners leh zirna kaihhnawih leh thil pawimawh dangte rêl a ni a; MZP general headquarters, headquarters, sub-headquarters, branch, college SU leh hnampual zirlai pawl aiawhte an tel.

MZP president Lalnunmawia Pautu chuan, "Ramin chhan a ngaih chuan MZP khawiah nge a awm? tih a ni fo ṭhin a, kan ram leh hnam tan MZP hi kan ding tlat tur a ni," a ti a, Borapansury-ah Zofa zin veivakte chawlh hahdam nan MZP hruaitu hmasate'n Zofate Chawlhbuk an lo din chu a hlu a tih thu a sawi.

Rorel zawhah MZP hruaitute leh Borapansury VC-te an inkawm a, Borapansury leh a chhehvela Chakma foreigners, a ruka Mizo-rama lo lutte chungchang leh hmalak ho dan tur an sawiho bawk.

MZP thurelte

* Mizoram chhunga Chakma foreigners awmte hnawh chhuah a nih theih nan MZP-in hmala rawh se.

* Mizoram chhunga hnam dang dan loa sumdawnna kalpui mekte hi MZP-in dapchhuah ni se, Mizoram sorkarin tihtawp a nih theih nan hmalak ni rawh se.

* Kan Mizo nunphung leh kan history-te a tam thei ang ber zirlaibuah telh a nih theih nan MZP-in hmala rawh se.

* Kum 2019-a Mizoram Legislative Assembly-in a lo passed tawh, Mizoram Governor-in a pawmpui loh, 'The Mizoram Maintenance of Household Register Bill 2019' hi a hlawhtlin theih nan MZP-in hmala rawh se.

* Mizoram zirna-in hrang hrang school, hostel fees leh facilities a inmil em tih zirchiangin a ṭul angin MZP-in hmala rawh se.