NHM-a thawkte hlawh pek thuai phut

Mizoram Pradesh Youth Congress Committee (MPYCC) chuan thuchhuah siamin, National Health Mission (NHM) hnuaia thawkten December 2022 leh January 2023 hlawh an la la lo nia tarlangin, a rang thei ang bera an hlawhte pe chhuak nghal turin Mizoram sorkar an phut.

MPYCC chuan NHM, Mizoram hnuaiah 4th grade aṭanga doctor specialist thlengin mi 2200 chuang an thawk mek tih tarlangin, "Hah pawh sawi thei loin mipuite hrisel nan indaih lo tak chungin an duty a ni. Hetih mek laia an thlabi hlawh sorkarin a batsak reng ṭhin hi vanduaithlak kan ti hle," an ti.

December 2022 leh January 2023 hlawh atana Central sorkarin a tum ve tur (90:10) chu December 24, 2022 khan Mizoram sorkarah an rawn release tawh tih tarlangin MPYCC chuan, "Engti kawng maha chhuanlam siam lo tur leh tikhawtlai loa NHM thawktute hlawh hi pe chhuak nghal turin Mizoram sorrkar hi tih tak zetin kan phut," an ti a, a ṭulna apiangah NHM thawktute thlavang an hauh tlat zel tur thu an tarlang.