Swab test man titawp turin sorkar phût

Zoram Peoples' Movement (ZPM) Ṭhalai chuan, Covid-19 vei leh vei loh endikna, swab sample test man lâk chu sût turin Mizoram sorkar an phût.

ZPM Ṭhalai chuan thuchhuah siamin, swab sample endik theihna tur khawl eng emaw zat leina atan Chief Minister's Relief Fund hman a nih thu an tarlang a; chutih rualin, Truenat siamtu Molbio Diagnostics Pvt. Ltd Region Office an biaknaah, Truenat khawl pakhat chu cheng nuai 20 vel man a nih thu leh, chu chuan screening leh confirmation test kit eng emaw zat a chhawm thu an lo hrilh tih an sawi.

March 28-a sorkar thuchhuahah, CM Relief Fund aṭangin Truelab Quattro Realtime Quantitative Micro PCR Machine (Truenat) 10 lei nan Rs. 2,01,15,000 leh chu'ng kháwlin a ken tel mamawhte lei nan Rs. 1,18,68,830 hman a ni.

CM Relief Fund aṭanga swab sample endikna khawl leh ṭul dangte leina atan cheng nuai 100 chuang sên a nih si laia swab sample endik man lak a ni chu pawi an tih thu sawiin ZPM ṭhalaite chuan, "Mimal, páwl, kohhran leh MLA inphalte'n Covid-19 dona atana sum an pêk khawm hi sum siam nan sorkar hian hman a tum ta mai em ni?" an ti.

ZPM Ṭhalai chuan, Ministry of Home Affairs (MHA) aṭangin Mizoram sorkarin State Disaster Relief Fund (SDRF) atan cheng vaibelchhe tam tak a dawng tih sawiin, "MHA-in state hrang hranga SDRF a pek chhuahah Covid-19 vanga harsatna tâwk nasa state chu pek tam an ni a, Covid-19 léng buaipuina atana hman a nih theih nan Covid-19 chu 'notified disaster'-ah a puang a ni," an ti a; MHA aṭanga SDRF atana sum a dawnte hmanna puangzar turin Mizoram sorkarin an phût a ni.

ZPM ṭhalaite chuan, "Mizoramah Covid-19 hri darh danah 'Community transmission' dinhmun kan thlen loh nan mipui tana harsatna siam záwnga swab sample test-naa sum siam tumna hi titàwp turin sorkar kan ngen a ni," an ti.