Haw tharte inkhung hran dan tur

Mizoram sorkar chuan, Mizoram páwn aṭanga Mizo­rama hawte leh state chhunga awm sa khung hran ngaite inkhung hran dan turah inkaihhruaina a puang a; rawn hawte khung hran hun chhung chu chawlhkar li (ni 28) a ni.

Sorkar thuchhuah tarlan danin, sorkar leh kohhran hmuna chawlh­kar hnih chhung khung hrante chu ni 14 hnuah an inah an haw ang a, chawlhkar thumna (ni 21-na thleng) chu mahni inah dan pangngaiin la khung hran (home quarantine) tur niin, chhungkaw member dangte nen ei leh in leh thil dangah hmanrua leh thawmhnawte inṭâwm loh tur a ni. Social distancing ṭha taka kalpui tur a ni bawk.

Chawlhkar lina (ni 22-na - ni 28-na) erawh chu zângkhai taka kalpui tur a ni a, mahni inchîk leh inngaihven chunga self-monitoring atana hman tur a ni.

Quarantine centre-a hun hmang zo tawh, mahni in lama haw turte chuan an awmna khua/veng task force-te biain, an remruatna hnuaiah haw tur a ni a; mahni in lama quarantine chhunga insawiselna nei chuan phone number 2323336 / 2322336/ 2318336-ahte inhriattir tur a ni.