NABARD sum hmanga sikul sak leh chei chhuitu tur Assembly House-a din phut

Nimin Assembly session-ah eptu MLA-ten NABARD sum hmanga Mizorama sikul sak ṭhat leh chei ṭhat chhui chiang tur inquiry committee din an phut.

ZPM member Vanlalhlana zawhna kal zelah NABARD sum hmanga sikul sak ṭhat leh chei ṭhatte chu ṭha tawk lo tam tak a awm thu te, DPR anga sak a nih loh thu te, DPR-ah GST telh a nih loh thu te, restricted tender koh niin a chhângtuten DPR-a GST a tel lo tih hre reng chunga an chhàn tho thute leh contractor atana thlan ni loten hna an thawh thute eptu member-te chuan an sawi chhuak a ni.

Hetihlai hian ruling MLA ṭhenkhatte chuan an bial chhungah NABARD sum hmang hian sikul chei ṭhat leh sak ṭhat hna ṭha taka thawh a nih thu an sawi chhuak thung. Hetiang a nih avang hian eptu MLA-te chuan inhnialna kumkhua tur thil a nih avangin House-in a chhui chiangtu tur inquiry committee din mai se an duh thu an thlen a ni.

Education minister Lal­chhandama Ralte chuan NABARD sum hmanga sikul sak leh chei ṭhatah duhthusam loh laite tih ṭhat a nih loh chuan bill pek chhuah loh tura thutlukna an siam thu sawiin, "Engineer-ten an endik zel a, ṭha an tih chiah bill kan pe. Member-ten in rawn sawite hi kan endik nghal zel a, a theih chin chinah a ṭha thei ang berin tih kan tum," a ti.