Lengpui Airport Chhanchhuah Hnatlang buatsaih; Lengpui Airport tihchhiat kan phal lo - MPCC

Mizoram Pradesh Congress Committee (MPCC) chuan nimin khan Lengpui Airport Chhanchhuah hnatlang an buatsaih. Hmun hnihah police nen hun eng emaw chen an innawr buai hnuah airport chhung luhna bulah inkhawm tawi an buatsaih.

Hnatlangah hian Congress party mite thawk chhuakin, police-in airport hungchhunga luh phal loin main gate-ah an dang a, midang anga pawisa chawia luh an dil pawha luh an phal loh avangin mipui leh police hi an innek deuh a, police hian Lalrobiaka (ex MLA) an vuak hnuah mipuiin an nawr tlang ta a ni.

MPCC Action Committee chairman H Zairemthanga chuan Lengpui Airport chu Congress sorkar laia sak ṭan leh sak zawh a nih thu sawiin, "Enchhin ngai neuh neuh a tam avangin Congress sorkar laia hawn hman a ni ta lo a, MNF sorkar thar a lo pian hnu lawk, December 2, 1998-ah hawn a ni ta a ni. Chuvangin, Lengpui Airport neitu nihna hi kan thinlungah a awm tlat a, tih hmel hema a awm hi kan duh lo a, kan rilru a na a ni," a ti.

Lengpui Airport chhung leh a pawn lam cheiṭhat hna chu M/s Zoramchhana (CM Zoramthanga tupa) leh M/s KR Construction (Kamrula Chhangte) te hnenah dan loa restricted tender hmanga a pek nia sawiin H Zairamthanga chuan, "A vaiin cheng vaibelchhe 116 man a ni. An hna thawh a ṭha loin, tui pawh pek pek mumal a ni lo," a ti a, nakinah chhiatna rapthlak zawk a thleng ang tih a hlauhawm thu a sawi.

MPYCC president Dr Lalmalsawma pawhin thu sawiin, "Lengpui Airport chim chungchangah MPYCC-in FIR kan thehlut a, MNF sorkarin engmah a ti chuang lo. Airport siamṭhat hna thawktuten bungraw thiar nana trolley an hmang leh an tichhe vek hi a ṭha lo kan ti. Trolley hman tur awm loh vanga NE newspaper hrang hranga Mizoram kan mualphote hi a na kan ti," a ti.

MPCC thuchhuah tarlan danin, Lengpui Airport-a contractor-ten trolley an tihchhiat chungchang hi NSUI chuan zirchiangin, Congress sorkar laia trolley 300-400 awm ṭhin kha 25 chauh hmantlak a awm tawh a ni tih an hmuchhuak. January 23, 2023 khan thuchhuah an siam a, contractor-ten trolley an tihchhiatte chu ni 15 chhung ngeia a thara thlak vek turin an phut a ni.

Amaherawhchu, an huntiam, ni 7.2.2023-a a ral thleng pawhin thlak a ni lo a, thlak tumna a awm lo. Tin, MNF sorkar aṭangin Contractor lakah action lak a ni lo.