Damdawi-in kum 100 tlin lawmna Christian Hospital-in an hmang

Christian Hospital, Serkawn (CHS) chuan nimin khan an damdawi-in kum 100 tlin lawmna, Centenary Celebration an hmang a, Health & Family Welfare minister Dr R Lalthangliana'n a hmanpui.

Centenary lawmna inkhawm Serkawn BCM Hall-a neihah minister Dr R Lalthangliana chuan, Mizorama damdawi-in leh medical college-a thawktu tur Mizo mithiam an indaih loh fo avangin zirlaite leh ṭhangtharte chu ṭan la thara, heng mamawhnate chhang thei tura ke pen chhuak turin a sawm.

Dr R Lalthangliana chuan, Mizoram hmasawn zelna turin mipuite damna leh hriselna a pawimawh hmasa ber tih a sawi a, "Kan health infrastructure-te ti changtlung zel turin sorkar chuan chak takin hma a la mek zel a, JICA-te nena ṭangkawpin Cancer Superspeciality Hospital din tum mek a ni. Heng bakah hian hospital awmsa tih changtlun, khawl ruahman belh leh sub centre, PHC-te tih changtlun kawngah pawh hmalak chhoh zel a ni," a ti.

He hunah hian Rev. Dr R Lalthanmawia, AGS Mission BCM chuan bentenary souvenir magazine a tlangzarh a, BCM secreatary Rev. R Lalbiakliana'n hospital centenary building thar a hawng bawk.

Christian Hospital, Serkawn hi February 10, 1923-ah din a ni a, Mizorama mission hospital hmasa ber niin, sorkar damdawi-in chhiar telin Mizorama damdawi-in hmasa pathumna a ni. Kum 1919-ah nursing zirna leh kum 1921-ah pharmacy neih a ni a, kum 1921-ah damdawi-in hi sak ṭan niin February 10, 1923-ah luah luh a ni.