Dr Vanlalthlana MICE sikul sak a ṭha lo a ti; Education Minister-in a chhan a sawifiah

ZPM member Dr Vanlalthlana chuan nimin Assembly session-ah MICE School building sak a ṭhat loh thu a sawi chhuak a, Education minister Lalchhandama Ralte chuan building sak hna a ṭhat loh chhan a sawifiah.

Dr Vanlalthlana chuan MICE School building sak chu a chhe hle nia sawiin, "DPR anga sak pawh a ni lo. Tunlaia school building saka tel ve tura tih pianphunga rualbanlote kal theihna chu ramp pawh dah a ni lo. Sak ṭhat tir emaw, sak belhtir a ni dawn em?" tiin a zawt a ni.

Education Minister chuan MICE School building sak chu a bilhah a tho fuh lo nia sawiin, "Sorkar hmasa kum 2016-2017 chhoa NEDP suma sak tura dah a ni. Kum 2018 a sorkarna kan chanin thawktu tur thlan tawh pawh an awm. Thawktu pathum an awm," a ti a, mi pathum sak a nih avangin buaichuar deuh a awm thu a sawi.

A building structure enin hetiang hian ti zawk se tih tur a awm tih sawiin Lalchhandama chuan, "A entrance a dik tawk lo, emergency exit a awm lo tih a ni a, hemi tur hi a drawing-ah a awm lo. Toilet pawh floor tina dah turin a drawing-ah telh a ni lo. Kan enzui mek zel a, kal fuh tawk lo a awm a ni," a ti.

MNF member Lalrinsanga Ralte zawhna chhangin Education Minister chuan, Mizorama sorkar sikulah zirlai 1,28,927 leh private leh kohhran sikulah zirlai 1,26,314 an awm mek thu House a hrilh.