An thil phût tihhlawhtlin a nih hma chu Tuikual South-in building hawn an phal lo

Aizawl Municipal Corporation (AMC) in Tuikual South huam chhunga building (market, parking, garage etc.) an sak chu Tuikual South khawtlangin an thil phût AMC lamin a tihhlawhtlin loh avangin hawn an phal lo.

He building hi nimin chhun dar 12:30 a hawn tura tih a ni a, hei hi duh loin Tuikual South Branch YMA bultumin veng mipuite building kawtah an pungkhawm a ni. Heivang hian building hi hawn theih a ni ta lo.

AMC-in building an sak hi AMC Multi Complex tia hming vuah niin, building-ah pawh hian tar a ni. Mah se, Tuikual South mipuite chuan building sakna hmun chu UT building awmna ṭhin a nih thu sawiin, AMC Multi Complex tih an remti lo. Building-a AMC Multi Complex tih intar chu nimin chhung ngei khan laksawn an phût a, building hming atan Tuikual South Multipurpose Complex tih an duh a ni.