Hnahthial Chanmari khawtlangin Sorkara lungawi lohna an lantir

Hnahthial South-III Village Council siam tharna atana sorkarin order a chhuah tawh chu tihdanglam tumna a awm nia an hriat avangin Hnahthial Chanmari veng mipui chuan order tihdanglam an duh lohzia lantir nan nimin khan an venga sorkar pisaa kai turte an dang a; Nahruaikâwnah sitting demonstration an huaihawt bawk.

Mipui pungkhawm chuan, Hnah­thial South-III VC ramri chu inchi khat pawh an duh belh loh thu te, sorkar chu a thu tihtluk tawhah ding nghet tura an phûtna thuziakte kengin an au rual a ni. Hnahthial Chanmari NGO Coordination Committee hruai­tute chuan nimin khan Chanmari YMA Hall-ah thuthar thehdarhtute an kâwm nghal.

1.    Hnahthial South-III area-a awm Chanmari bik (Lungleng veng chhiar tel loin)-ah in (household) 225 awmin, voter 600 chuang kan awm. Kan duh leh beisei anga VC thar kan nei ta hi kan lawm em em a ni.

2.    Hnahthial South-III VC thar hi Mizoram sorkarin February 27, 2020-a notification a tihchhuah (No B. 14016/8/2016-LAD/VC)-ah Chanmari VC tiin a chhuah tawh. Chu chu Lungleng vengin duh loin sorkarah dodalna an thlen a, 'Chanmari VC tih a nih chuan kan lungawi thei lo, Hnahthial South-III tih ni se kan lungawi ang,' an ti. Chanmari VC tih chu cancel a ni a, July 17, 2020-ah Hnahthial South-III VC tiin sorkar notification (No. B. 12011/1/2019-SEC/VC-Vol-II) a chhuak leh a ni.

3.    Chanmari khawtlang chuan Hnahthial South-III VC hi Chanmari VC cancel a nih tawh anga cancel leh emaw, a boundary tihdanglam emaw kan phal lo.

4.    Hnahthial South-III VC area hi Chanmari veng duh dan chauha siam a ni lo a, kan parent VC - Hnahthial South-I VC member-te nena lungrual taka siam a ni.

5.    Lungleng veng hi veng hrang hrangin an kárcheh a ni a, véng zauh zelna tur an neih tam loh avangin veng vanduai tak an nihna chen a awm. An vanduaina hi veng dang tan vanduaina a lo ni leh zel erawh hi chu pawi kan ti.